Татарстанның Буа районында капиталь ремонт һәм реконструкциядән соң мәктәп һәм балалар бакчасы ачылды

Бүген Татарстанның Буа районында капиталь ремонт һәм реконструкциядән соң мәктәп һәм балалар бакчасы ачылды. Ачылыш тантанасында ТР Премьер-министры Илдар Халиков һәм район башлыгы Азат Айзетуллов катнашты.

Иске Суыксу урта гомуми белем бирү мәктәбе 3 катлы кирпеч бинада урнашкан, ул 1977 елдан бирле эшли. Капремонт монда быел гыйнвар аенда башланган. Эшнең бәясе 24,3 млн. сум тәшкил иткән, шуларның 14,3 млн. сумы республика бюджетыннан, 10 млн. сумы – “Төньяк-көнбатыш магистраль нефтьүткәргечләре” ААҖнең спонсорлык ярдәме.

Илдар Халиков “Төньяк-көнбатыш магистраль нефтьүткәргечләре” ААҖнә һәм башка компанияләргә спонсорлык ярдәме өчен рәхмәт белдерде. Төзүчеләргә аерым рәхмәт җиткерде.

Быел Иске Суыксу урта мәктәбенең 1 классына 10 бала киләчәк, бүген аларның барысына да “Мәктәпкә җыенырга ярдәм ит” республика хәйрия акциясе кысаларында портфельләр тапшырылды.

ТР Фән һәм мәгариф министрлыгы мәгълүматлары буенча, быел “Мәктәпкә җыенырга ярдәм ит” республика хәйрия акциясе кысаларында 1 класска барачак 9760 балага, 2-11 класста укучы 4184 балага ярдәм күрсәтелгән.

Иске Суыксу мәктәбен караганнан соң, Илдар Халиков һәм район башлыгы Буа шәһәрендә “Ак каен” балалар бакчасы ачылышында катнаштылар. Реконструкциянең бәясе 26,4 млн. сум тәшкил иткән, шуларның 22,9млн. сумы ТР бюджетыннан, 3,5 млн. сумы район бюджетыннан.

Илдар Халиков сүзләренчә, бу көннәрдә капиталь ремонт һәм реконструкциядән соң мәктәп һәм балалар бакчалары бөтен республика буенча ачыла.