Илнар Гыйрфанов Россия юристлары ассоциациясенең Татарстан бүлеге рәисе булды

Россия юристлары ассоциациясенең Татарстан төбәк бүлеге рәисе итеп Илнар Гыйрфанов куелды. Мондый карар бүген ассоциация конференциясендә кабул ителде.

"Россиядә ассоцияләр күп, әмма юристларныкы барысыннан да аерылып тора. Россия юристлары ассоциациясендә 30 мең кеше, Татарстан бүлегендә шуларның 464 се исәпләнә. Алар профессионаллар һәм һәрдаим эшчәнлек алып бара, - диде Россия юристлар ассоциациясенең Татарстан бүлеге попечительләр советы рәисе Илдар Халиков. – Безнең төп бурычыбыз — гражданнарга бушлай юридик ярдәм күрсәтү. Шулай ук, авыл җирлегендә яшәүчеләргә дә юридик консультацияләр үткәрү мөһим”. Ул ассоцияциянең халык тарафыннан яхшы кабул итүен дә искәртеп узды, һәм яшьләрне үз рәтләренә кертергә кирәклеген әйтте.

Конференция барышында берничә мәсьәлә каралды. Беренче эш итеп, Ассоцияциянең төбәк бүлеге җитәкчесен вазыйфасыннан азат итү һәм аның урынына яңа вәкилне сайлап куйдылар. Элек бу вазыйфаны башкарган Мидхәт Курманов, июнь аенда узган киңәшмәдә рәислектән китү теләген белдергән булган. Бүген исә аның урынын Казан (Идел буе) федераль университет тәмамлаган 1988 нче елгы Илнар Гыйрфанов алды. Яңа кандидатны Илдар Халиков үзе тәкъдим итте. Илнар Гыйрфанов 2012 нче елдан алып Россия юристлары Ассоциациясе каршындагы яшь юристлар берлегенең Татарстан бүгеген җитәкли, “Яшь Россия” төбәк партиясен булдыручыларның берсе булып тора.

Утырыш барышында Россия юристлар ассоцияциясенең яңа әгъзалары сайланды, Илдар Халиков аларга таныклыклар тапшырды, кунакларның чыгышлары тыңланды.