2015 елда Татарстан Республикасында социаль программаларны гамәлгә ашыру дәвам итәчәк

2015 елда Татарстан Республикасында социаль программаларны гамәлгә ашыру дәвам итәчәк. Бу хакта бүген Татарстан Республикасы Премьер-министры Илдар Халиков Арча муниципаль районы активы белән очрашуда белдерде. Очрашу Арча шәһәренең күпфункцияле мәдәни-спорт үзәгендә узды.

Бездә проблемалы мәсьәләләр бар әле, диде Илдар Халиков, болар – авылларда каты өслекле юллар салу, авыл урамнарын яктырту программасы, “Чиста су “ программасы һ.б. Бүген Татарстан Президенты Рөстәм Миңнеханов, 2015 елда бу һәм башка күп социаль программалар дәвам итәчәк дигән карар кабул итте, дип белдерде ул.

Гомумән республикада гражданнарның яшәү сыйфатын яхшырту өчен күп эшләнә, балалар бакчалары ачыла, мәктәпләргә капиталь ремонт ясала, фельдшер-акушерлык пунктлары һәм авыл клублары төзелә. Боларның барысын да тотрыклы икътисад булганда гына тормышка ашырырга мөмкин, дип билгеләде Илдар Халиков. Бүген республика өчен мөһим булган проектлар арасында ул “ТАНЕКО”, ТАИФ-НК” һ.б. атады, 2015 елда аммиак, метанол һәм карбамид җитештерү буенча тагын бер зур предприятие – “Аммоний”ААҖ (Менделеевск) ачылачагын белдерде.

ТР Хөкүмәте башлыгы индустриаль мәйданчыклар арасында “Алабуга” МИЗын, “Мастер” Кама индустриаль паркын, “Химград” технопаркын һ.б. атады. Бу мәйданчыкларның үсеше Татарстанга инвестицияләр килүен белдерә.

Илдар Халиков сүзләренчә, Татарстанда авыл җирлегенә җитди игътибар бирелә. 2013елда авылларга ярдәм өчен 17 млрд. сум акча бүлеп бирелгән, диде ул.
Бүген Татарстан илдә сөт җитештерү буенча беренче, ит һәм бәрәңге җитештерү буенча икенче урынны алып тора, дип белдерде ТР Премьер-министры. Крестьян-фермер хуҗалыкларына һәм гаилә фермаларына аерым игътибар бирелә. Республикада шундый 1 меңнән артык гаилә фермасы эшли.

Илдар Халиков күп социаль программаларның республика районнарындагы очрашуларга бәйле барлыкка килүен искә төшерде, халык ул очрашуларда үзләренең проблемалары һәм нәрсәгә мохтаҗ булуларын белдерә. Һәм бу проектларның барысы да тормышка ашырыла, социаль программалар безнең өстенлегебез булып тора, диде ул.