Илдар Халиков Кама Тамагы районында яңа мәдәният йорты ачылышында катнашты

Бүген Татарстан Премьер-министры Илдар Халиков Кама Тамагы районында булды. Ул Бәрлегуҗа авылында күп функцияле үзәк ачылышында катнашты, Сөйкидә төзелгән яңа янгын сүндерү депосын карады, район активы белән очрашты.

Илдар Халиков Баргузино авылы халкын күпфункцияле үзәк ачылышы белән котлады. Ул шулай ук төзүчеләргә ТР Хөкүмәтенең рәхмәт хатын тапшырды.

Сөйкидә ТР Хөкүмәте башлыгы яңа янгын сүндерү депосын карады һәм “Фоника Гипс” заводында булды. Монда район активы белән очрашу узды.

Очрашуны Кама Тамагы районы башлыгы Зөфәр Гәрәфиев ачты. Ул максатчан программалар кысаларында районда башкарылган эшләр, социаль учреждениеләр, шәһәр төзүче предприятиеләрнең эшләре турында сөйләде, авыл хуҗалыгы производствосындагы вәзгыятьне билгеләп үтте. Республика җитәкчелегенә һәрьяклап ярдәм итүләре өчен рәхмәт белдерде.

Илдар Халиков үзенең чыгышында бүгенге эшлекле очрашу барышында күргәннәрен югары бәяләде. “Сездә зур җитештерү предприятиесе бар. Район инвестицияләр ярдәме, төрле программаларны гамәлгә ашыру нәтиҗәсендә үзгәрә, биредә яшәүчеләр өчен шартлар тудырыла. Районда туризм, балыкчылык һ.б. үстерү өчен яхшы потенциал бар”, - дип белдерде ул.

Аның сүзләренчә, республикада 30 дан артык программа гамәлгә ашырыла. Ул республиканың социаль-икътисадый үсеше һәм киләчәк перспективалары турында сөйләде.