ТР Премьер-министры Тәтеш районында яңа фатир алучыларга ачкычлар тапшырды

Бүген Татарстан Премьер-министры Илдар Халиков Татарстанның Тәтеш районында булды. Монда ул күп фатирлы яңа йорт ачылышында катнашты һәм район активы белән очрашты.

“Строительные технологии” ҖЧҖ тарафыннан төзелгән йорттан 11 ятим балага, бюджет өлкәсендә эшләүче 5 хезмәткәр гаиләсенә һәм грант ярдәмен алган 2 медицина хезмәткәре гаиләсенә фатир бирелгән.

Бу чараны ачып, район башлыгы Валерий Чершинцев республика Хөкүмәтенә рәхмәт белдерде. “Йортлар күбрәк булган саен, шәһәребездә күбрәк кеше яшәячәк”,- диде ул.

Яңа фатирлы булучыларны котлап, Илдар Халиков, фатирларында җылы, уңайлы-җайлы булуны, күршеләре белән дус яшәүләрен, йортларында шатлыклы вакыйгаларның күп булуын теләде. ТР Министрлар Кабинетының Рәхмәт хаты намуслы хезмәтләре өчен төзүчеләргә тапшырылды.

Монда ук авария хәлендәге торактан күчерү программасы буенча йорт төзелешенә старт бирелде.

Алга таба Илдар Халиков “Барс” спорт-сәламәтләндерү комплексында булды: монда ул бассейн төзелешенең барышы белән танышты.

Район мәдәнияты йортында район активы белән очрашу узды.

Районның ничек яшәве турында аның башлыгы Валерий Чершинцев сөйләде. Позитив мизгелләр арасында – “Волжанка” сәнәгать паркы үсеше, җиләк-җимеш җитештерү һәм минераль су тутыру производствосы үсеше буенча инвесторлар эше. Район игенчеләре комбайн бункерларыннан 80 мең тоннага якын ашлык биргәннәр. Гаилә фермалары һәм шәхси ярдәмче хуҗалыклар уңышлы үсеш алган. Район 26 федераль һәм республика программасында катнаша, берьюлы 60 объектта эш алып барыла. Проблемалар арасында эшсезлек аталды, аның дәрәҗәсе республика буенча уртача күрсәткечтән ике тапкыр диярлек югары (1,1 процент), шулай ук 15 торак пунктка каты өслекле юл салынмаган.

Үзенең чыгышында Илдар Халиков район халкына республиканың социаль-икътисади үсеше турында сөйләде. “Гомуми икътисади хәл бик катлаулы, әмма республикада зур предприятиеләр күп булганлыктан, без барлык социаль программаларны саклап кала алдык. Җыелган салымнарга йортлар, спорт комплекслары, юллар, клублар – халыкка кирәкле объектлар төзибез. Алар моны күрә, шуңа күрә тәртип, ышаныч, аңлау бар”, - диде Хөкүмәт башлыгы.

Тәтеш районының авыл хуҗалыгы хезмәткәрләренең эшенә анализ ясап, Премьер-министр авыл хуҗалыгындагы уңай үзгәрешләрне билгеләп үтте, икмәк җыю һәм гаилә фермалары үсеше буенча күрсәткечләрнең начар булмавына һәм республика азык-төлек тотрыклылыгын тәэмин итә алачагына ышаныч белдерде.
 
Илдар Халиков шулай ук юллар төзелеше, яктырту, су белән тәэмин итү буенча республика программалары киләчәктә дәвам итәчәк, дип ышандырды.