Татарстанның Иске Чүпрәле авылында яңа янгын сүндерү депосы ачылды

Бүген Татарстанның Чүпрәле районы Иске Чүпрәле авылында яңа янгын сүндерү депосы ачылды. Яңа объектны ачу тантанасында Татарстан Республикасы Премьер-министры Илдар Халиков, ТР гадәттән тыш хәлләр һәм гражданнар оборонасы эшләре буенча министр Рафис Хәбибуллин, Чүпрәле районы башлыгы Александр Шадриков катнашты.

Яңа бина мәйданы буенча берничә тапкыр кечерәк булган иске бина янында төзелгән.

Ачылыш тантанасын ачып, Александр Шадриков, яңа янгын сүндерү депосы Чүпрәле районы халкының иминлеген тәэмин итә, дип белдерде.

“Тормыш шундый, кызганычка каршы төрле хәлләр була. Мондый хәлләрне профилактикалау һәм кисәтү өчен шартлар булдыру, шулай ук андый хәлләр килеп чыккан очракта беренче чиратта кешеләрнең тормышы һәм сәламәтлегенә, мал-мөлкәтенә мөмкин кадәр азрак зыян булсын өчен барысын да эшләү безнең уртак бурычыбыз”, диде Премьер-министр.

Илдар Халиков эзләү-коткару отрядлары башлыкларына яңа УАЗ-23632 UAZ Pickup һәм UAZ PATRIOT авария-коткару автомобильләре ачкычларын тапшырды. Бу автомобильләр республиканың барлык территориясендә эзләү-коткару эшләрендә һәм автомагистральләрдә юл-транспорт һәлакәте булганда кулланылачак.

Дәрәҗәле кунакларга яңа бинаның символик ачкычы тапшырылганнан соң, янгын сүндерү депосының рәсми ачылышы булды.