“С.П.Горбунов исемендәге Казан авиация җитештерү берләшмәсе” ААҖ Россия Президенты эшләре идарәсенә ике ТУ-214 СР самолетын файдалануга тапшырды

“С.П.Горбунов исемендәге Казан авиация җитештерү берләшмәсе” ААҖ нең Берләшкән авиатөзелеш корпорациясенә керү процедурасын 2009 елның җәендә тәмамлау күздә тотыла. Бүген Россия Президенты эшләре идарәсенә ике Ту-214 СР самолет-ретрансляторын тапшыру тантанасыннан соң, журналистларга бу турыда Берләшкән авиатөзелеш корпорациясе президенты Алексей Федоров хәбәр итте. Әлеге тантанада Татарстан Премьер-министры Рөстәм Миңнеханов катнашты.
Массакүләм мәгълүмат чаралары вәкилләренең сорауларына җавап биреп, Алексей Федоров бүген Берләшкән авиатөзелеш корпорациясенең эмиссия процедурасы тәмамлануын һәм җәй дәвамында Горбунов исемендәге Казан авиация җитештерү берләшмәсен Берләшкән авиатөзелеш корпорациясенең тулы хокуклы әгъзасы итү планлаштырылуын әйтте.
Россия Президенты эшләре идарәсенә тапшырылган ике Ту-214 СР махсус бортларына килгәндә, Алексей Федоров аларның махсус дәүләт функцияләре өчен төзелүен, сертификацияләнгән булуын һәм бөтен халыкара стандартларга туры килүен, дөньяның бөтен иленә оча алуын билгеләп үтте. Сынаулар комплексы экстремаль шартларда сынаулар үткәрүне дә үз эченә ала (аерым алганда, Ерак Көнчыгыш юнәлешендә, Мәскәү тирәсендә самолетлар җиргә төшмичә якынча 13 сәгать очкан).
“Хәзер Горбунов исемендәге Казан авиация җитештерү берләшмәсе цехларында җыела торган тагын берничә самолет төрле функцияләр башкару өчен билгеләнгән”, - диде Алексей Федоров.
Журналистларның сорауларына җавап биреп, Берләшкән авиатөзелеш корпорациясе президенты самолетларга урнаштырылган заманча техниканың Россиядә җитештерелүен әйтте.
Ту-214 серияле самолетлары - якынча 1 млрд. сум, Россия Президенты эшләре идарәсе заказы буенча җыелганнары, лайнерлар бортына урнаштырылган аппаратура хисабына, кыйбатрак тора. Бөтен аппаратура күп тапкыр резервта саклауны күздә тота.
Шуны да искәртик: Ту-214 Ту-204 нең йөк ташый һәм пассажирлар йөртә торган камилләштерелгән төре булып тора, һәм ул уртача һәм ерак арага пассажирлар йөртү һәм йөк ташу өчен билгеләнгән. Урыннарның максималь саны – 210.
Россия Президенты эшләре идарәсенең махсус заказы буенча “Туполев” ААҖ тарафыннан Ту-214 нең махсус элемтә чаралары белән җиһазландырылган төрләре чыгарылды: Ту-214 СР (самолет-ретранслятор), Ту-214 ПУ (идарә итү пункты), Ту-214 СУС (самолет - элемтә үзәге).