ТР Премьер-министры: Саба районы агросәнәгать комплексында алдынгылар рәтендә

Бүген Байлар Сабасында яңа балалар бакчасы ачылды. Тантанада Татарстан Республикасы Премьер-министры Илдар Халиков катнашты. 120 балага исәпләнгән мәктәпкәчә яшьтәгеләр учреждениесе “Шоколад” исемен йөртәчәк.

Илдар Халиков ТР Президенты исеменнән һәм шәхсән үз исеменнән балаларны һәм аларның әти-әниләрен балалар бакчасы ачылу белән котлады. “Бу көннәрдә сездә генә түгел, республика буенча 56 яңа балалар бакчасы ачыла. Сезнең бакча да сыйфатлы итеп төзелгән, бик кызыклы исем дә тапкансыз. “Шоколад” барыгыз өчен яраткан урыныгыз булсын” ,– диде ул.

Илдар Халиков төзүчеләргә Министрлар Кабинетының Рәхмәт хатларын тапшырды. Төзелешне алып барган “Ак таш” җәмгыяте җитәкчесе Газинур Әхмәтов бинаның символик ачкычын балалар бакчасы мөдире Фирая Исмәгыйлевага тапшырды.

Ачылыш тантанасыннан соң кунаклар бакчаның җиһазланышы белән таныштылар. Аеруча спорт комплексы һәм тренажерлар белән җиһазланган бүлмәләр кызыксыну уятты. Балалар бакчасында өстәмә белем бирү хезмәте күрсәтеләчәк, чит телләр укытылачак. Балаларның интеллектуаль һәм музыкаль сәләтләре үстереләчәк. Сәламәтләндерү гимнастикасы булачак.
Гомуми мәйданы 1790 кв.м булган балалар бакчасы төзелешенә 74 млн. сум акча тотылган.

Илдар Халиков районда татар халкының милли бәйрәме “Сабантуй” үткәрелә торган урында төзелгән стендка ату комплексы белән танышты. . Стендка ату буенча Россия чемпионы Василий Мосин кунакларга үзенең профессиональ осталыгын күрсәтте һәм комплексның өстенлекләре турында сөйләде.

Соңыннан Илдар Халиков мәдәният йортында Саба муниципаль районы активы белән очрашты.

“Саба районында үзгәрешләр бик күп, төзелешләр генә түгел, ә халыкның да психологиясе үзгәрә. Гомумән, катлаулы, икътисадый хәлгә карамастан, республикада, шул исәптән Сабада да барлык предприятиеләр тотрыклы эшли, дип билгеләде Премьер-министр.

Илдар Халиков, бүген авыл хезмәтчәннәренең игътибары катлаулы һава торышы шартларында үстерелгән уңышны югалтусыз җыеп алуга юнәлтелгән булырга тиеш , дип ассызыклады.