ТР Премьер-министры Белем көнендә Әгерҗедә үзе укыган мәктәптә булды

Бүген Татарстан Республикасы Премьер-министры Илдар Халиков Әгерҗедә үзе укыган мәктәптә булды. Ул Әгерҗе шәһәренең 2нче урта мәктәбендә 1 сентябрь – Белем көненә багышланган тантанада катнашты.

Мәктәп алдындагы мәйданчыкта Илдар Халиков үзенең укытучылары-ветераннар Валентина Латыпова, Галина Стрелова һәм Геннадий Киселев белән исәнләште.

“2015 елда мәктәпне тәмамлаганга 30 ел була. Күп вакыт узган, әмма мәктәп еллары, укытучылар һәм классташлар онытылмый. Менә бүген дә, үземнең укытучыларымны күреп, яңадан мәктәп елларына әйләнеп кайткан кебек дулкынланам. Рәхмәт сеззгә укытучыларым”, - дип Илдар Халиков рәхмәт белдерде. Ул үзе укыган, классташлары белән очрашкан мәктәп коридорлары буйлап узды, химия кабинетында булды.

Алга таба ТР Хөкүмәте башлыгы “Октябрьский” микрорайонында 15 йортны файдалануга тапшыру тантанасында катнашты.
Яңа фатир ачкычларын бүген 267 гаиләгә тапшырдылар. Илдар Халиков Алексей һәм Любовь Тарасовлар фатирында булды.

Аннан соң Илдар Халиков Мәдәният йортында Әгерҗе районы активы белән очрашты. Район башлыгы Валерий Макаров районның социаль-икътисади үсеше, 18 социаль программаны гамәлгә ашыру нәтиҗәсендә халыкның яшәешен яхшырту турында сөйләде.

“2015 елда барлык 30 программа да республика шәһәрләре һәм районнарында эшләячәк, дип ышандырды Татарстан Президенты Рөстәм Миңнеханов. Татарстан Россиядә күп күрсәткечләр буенча алдынгы, күп төбәкләр өчен үрнәк булып тора”,- дип белдерде Илдар Халиков.