ТР Премьер-министры: “Менделеев – үсә торган территория”

Бүген Татарстан Республикасы Премьер-министры Илдар Халиков Менделеев шәһәрендә булды. Анда дүрт объектның тантаналы ачылышы узды: атмосфера һавасының пычрануын күзәтүче автомат станция, ремонтланган Мәдәният йорты, 1нче мәктәпкә өстәмә төзелеш һәм Татарстан урамындагы 7нче торак йортның икенче чираты.

Беренче ачылган объект- атмосфера һавасының пычрануын күзәтүче автомат станция булды. Стационар пункт химия предприятиеләре бүлеп чыгарган пычратучы матдәләрне өзлексез теркәп баруны тәэмин итү өчен билгеләнгән.
“Халык районның экология торышы белән кызыксына, чөнки монда зур сәнәгать потенциалы тупланган. Яңа станция экологик хәлне контрольдә тотарга мөмкинлек бирәчәк”, -дип белдерде Менделеев районы башлыгы Игорь Привалов.
Тантанада катнашучы мәктәп укучылары станцияне карадылар һәм аның эше белән таныштылар.

Татарстан Хөкүмәте башлыгы алга таба 1нче мәктәпнең 400 урынга исәпләнгән өстәмә төзелеше ачылышында катнашты. “Еллар узгач кына аңлыйсың, тормышта мәктәп белән укытучыларның мөһимлеген. Мәктәпкә беренче аяк басучыларга да, шулай ук калган укучыларга да кызыксынып һәм тырышып укуларын телим”, - диде ул.

Илдар Халиков һәм Игорь Привалов шулай ук социаль ипотека программасы буенча төзелгән 84 фатирлы 7 нче йортның икенче чираты ачылышында катнаштылар. Бүген яңа фатир ачкычларын Бөек Ватан сугышы ветераннары, сугышта катнашучыларның тол хатыннары, күп балалы гаиләләр, ятим балалар һәм ата-ана каравыннан мәхрүм калган балалар, бюджет өлкәсендә эшләүчеләр, Карпов исемендәге “Менделеевсказот” ҖЧҖ химия заводы хезмәткәрләре алды.
“Яңа фатир алучыларның шатлыклы йөзләрен күрүе бик рәхәт. Мин сезне бу күңелле вакыйга белән котлыйм”, - дип белдерде Илдар Халиков.

Менделеев шәһәрендә Сергей Гассар исемендәге Мәдәният йорты ачылу зур бәйрәмгә әйләнде. Махсус бу көнгә җирле коллективлар бию композицияләрен әзерләгәннәр.
Концерт залында ТР Хөкүмәте башлыгы район активы белән очрашты. Муниципаль берәмлекнең ничек яшәве турында район башлыгы Игорь Привалов сөйләде.

Илдар Халиков үзенең чыгышында республиканың социаль-икътисади үсеше турында сөйләде. “Менделеев - үсә торган территория инвестицияләр буенча алдынгылар рәтендә. Республика һәм сезнең район тормышында күңелле вакыйгалар күбрәк булсын”, -дип теләде Илдар Халиков.

Күпьеллык намуслы хезмәте һәм төзелеш комплексы үсешенә зур өлеш керткәне өчен “Созидание” төзелеш компаниясе” ҖЧҖ директоры Рамил Җиһаншинга ТР Премьер-министры ТР Министрлар Кабинетының Рәхмәт хатын тапшырды.