Татарстанда нефть продуктларына бәя арту нефтькә бәя күтәрелә башлауга бәйле

27 нче майдан Татарстанда һәм Россия Федерациясенең башка төбәкләрендә бензин һәм дизель ягулыгының ваклап сату бәяләре арта башлаган. Бәяләрнең үсүе дөньяда, шулай ук Россиядә нефтькә бәя күтәрелә башлауга бәйле.
Бүген Татарстан Республикасы Министрлар Кабинетында узган брифингта бу турыда Татарстан Республикасында ягулык-энергетика ресурсларының сыйфатлылыгын һәм алардан рациональ файдалануны тәэмин итү идарәсе башлыгы Роберт Гыйлаҗиев хәбәр итте. Брифинг Татарстан Республикасының күпләп һәм ваклап сату базарларындагы нефть продуктларының сыйфатына һәм аларга агымдагы бәяләр белән бәйле хәлгә багышланган иде.
Роберт Гыйлаҗиев сүзләренә караганда, 8 нче июньгә алынган мәгълүматлар буенча, республикада 95 нче бензинның иң югары бәясе 20 сум 20 тиен булган, әлеге күрсәткеч буенча республика округта алтынчы урынны алып торган. Анда нефть продуктының бу төренә аеруча түбән бәяләр куелган булган.
Республикада 92 нче бензинның ваклап сату бәясе кичә 19 сум иде. Әлеге күрсәткеч буенча Татарстан 10 нчы урында тора. Идел буе федераль округында нормаль-80 бензинының иң югары ваклап сату бәясе Татарстан Республикасында теркәлгән – 17 сум. Дизель ягулыгының иң югары бәясе – 18 сум, бу күрсәткеч буенча республика Ульяновск, Пенза, Саратов, Түбән Новгород һәм Йошкар-Оладан соң алтынчы урынны алып тора, әлеге шәһәрләрдә дизель ягулыгы бәясе 17 сум 10 тиеннән башлана.
“Агымдагы елның 20 нче маена кадәр республика ваклап сату бәяләре күрсәткече буенча Идел буе федераль округында урта позицияләрне алып тора иде. Кайбер очракларда, аерым алганда, 92 нче номерлы бензин бәясе бездә иң арзаны булды”, - дип билгеләп үтте Роберт Гыйлаҗиев.
“Нефть продуктларына бәя арту дөньяда, шулай ук Россиядә нефтькә бәя күтәрелә башлауга бәйле. Шуның нәтиҗәсе буларак, мотор ягулыгының күпләп һәм ваклап сату бәясе арта башлады”, - диде брифингта катнашучыларның берсе. Брифингта катнашучылар Татарстанда бензин һәм дизель ягулыгы бәяләре алга таба да артачакмы икәнлеге турында алдан нинди дә булса мәгълүмат бирүдән баш тарттылар һәм базардагы хәлнең аңлаешсыз булуын моңа сәбәп итеп китерделәр.