Татарстан Хөкүмәте башлыгы Рөстәм Миңнеханов “ICL-КПО ВС” ААҖ нең Директорлар советы әгъзалары белән очрашты

Бүген Татарстан Республикасы Премьер-министры Рөстәм Миңнеханов Татарстан Республикасының Хөкүмәт йортында “ICL-КПО ВС” ААҖ нең Директорлар советы әгъзалары белән очрашты. Очрашуда Сатору Хаяши - Fujitsu Technology Solutions ның башкарма рәис урынбасары, Роже Семприни – “ICL -КПО ВС” ААҖ нең Директорлар советы рәисе, Fujitsu Technology Solutions ның Төньяк-Көнчыгыш Европа, Россия, БДБ илләре төбәгендәге башкарма директоры, Валерий Васильев – “ICL -КПО ВС” ААҖ Директорлар советының рәис урынбасары, Татарстан Республикасы Дәүләт Советы депутаты, Виктор Дьячков – “ICL КПО ВС” ААҖ нең Директорлар советы әгъзасы, “ICL КПО ВС” ААҖ нең генераль директоры һ.б. катнашты.
Шуны да искәртик: ICL-КПО ВС – мәгълүмати технологияләр өлкәсендә комплекслы карарлар һәм төрле масштабтагы мәгълүмати системаларга консалтинг, проектлаштыру, кертү, гарантия һәм сервис хезмәте күрсәтүне тәкъдим итә торган Россия компаниясе. Мәгълүмати коммуникацияләр, мәгълүматны саклау һәм материаль-техник тәэминат бүлеге башлыгы А.Р.Хәйруллин хәбәр иткәнчә, бүгенге очрашуда компаниянең якындагы 3-5 елдагы үсеш перспективалары турында фикер алышканнар.
2007 елда, программалы тәэмин итүне камилләштерү хезмәтләрен чит илгә чыгаруга бәйле булган юнәлешне актив үстерү максатыннан, “ICL -КПО ВС” ААҖ базасында Глобаль хезмәтләр тәкъдим итү үзәге (Global Delivery Centre) төзелә. Глобаль хезмәтләр тәкъдим итү үзәге – IT-базар җитештерүчеләренең бөтендөнья лидерлары өчлегенә керә торган Fujitsu компаниясенең Европа заказчылары өчен хезмәтләр тәкъдим итә торган структур бүлекчә. Хәзерге вакытта “ICL-КПО ВС” ачык акционерлык җәмгыятендә экспорт өчен программалы тәэмин итүне камилләштерү юнәлешендә якынча 140 кеше эшли. “ICL-КПО ВС” ААҖ экспорт өчен программалы тәэмин итүне камилләштерү белән шөгыльләнүче хезмәткәрләр штатын 800 кешегә кадәр арттырырга планлаштыра.
Fujitsu Technology Solutions компаниясе, “ICL-КПО ВС” ААҖ акционеры буларак, актив катнашырга һәм югары технологияләр өлкәсендәге IT-парк резиденты булырга теләк белдерде.

Белешмә өчен:

“ICL-КПО ВС” компаниясе 1991 елда Казан исәпләү системалары җитештерү берләшмәсе (КПО ВС) һәм International Computers Limited (ICL) Британия компаниясе тарафыннан оештырыла. Fujitsu Services Limited (элек ICL) компаниясе компания акцияләренең контроль пакетына ия (51 %). Бөтендөнья мәгълүмати технологияләр лидеры - Fujitsu Limited корпорациясе белән кушылу ICL-КПО ВС компаниясенә яңа технология һәм эшләнмәләргә юл ача. Бүгенге көндә ICL-КПО ВС Россиядәге иң зур системалы интегратор булып тора. Компаниянең даими клиентлары исәбенә федераль министрлык һәм ведомстволар, Россиянең телекоммуникацияләр һәм ягулык-энергетика тармагына караган эре предприятиеләре, банклар, сәнәгать һәм сәүдә төркемнәре, дәүләти һәм коммерцияле компанияләр керә.