Казанда 30 төбәкнең территориаль салым органнары киңәшмәсе уза

Бүген Идел буе физик культура, спорт һәм туризм академиясенең уку-лаборатория корпусында территориаль салым органнарының семинар-киңәшмәсе эшен башлады. Анда салым тикшерүләрен, салым бәхәсләрен судка кадәр җайлау һәм аларның судта каралуын планлаштыру мәсьәләләре каралачак. Киңәшмә эшен Федераль салым хезмәте җитәкчесе урынбасарлары Дмитрий Егоров һәм Сергей Аракелов җитәкли.

Киңәшмәдә катнашучыларны Татарстан Премьер-министры Илдар Халиков һәм Россия Федераль салым хезмәтенең ТР буенча идарәсе җитәкчесе Марат Сафиуллин сәламләде.

Бу чараны ачып, Марат Сафиуллин, семинар аның катнашучыларына тәҗрибә уртаклашырга мөмкинлек бирәчәк, дип белдерде. “Быел икътисади үсеш темпларының түбәнәюенә карамастан, Татарстанда керемнәрнең уңай динамикасы саклана. 2014 елның беренче яртыеллыгында түләүләр узган елга караганда 20 %ка арткан һәм 192 млрд. сум тәшкил иткән”, - диде ул.
Марат Сафиуллин шулай ук Татарстанда электрон хезмәтләр спектрының киңәюенә игътибар бирде.

Илдар Халиков үз чиратында, киңәшмә барышында каралачак мәсьәләләр һәрвакыт актуаль булды, ләкин хәзерге икътисади хәлгә бәйле рәвештә тагын да әһәмиятлегә әверелделәр, дип билгеләде. “Семинар Татарстан белгечләренә күп мәсьәләләр буенча эш сыйфатын күтәрүгә мөмкинлек бирәчәк”,- дигән ышанычын белдерде ул. – Дәүләт органнарының һәрвакыт камилләшүе һәм эш буенча үзләренең дәрәҗәләрен күтәрүләре бик мөһим”.

Ике көнлек киңәшмәдә 30 төбәктән вәкилләр – 1200дән артык белгеч катнаша. Киңәшмә барышында контроль чаралар нәтиҗәләре буенча дәлилләү базасы сыйфаты, салым тикшерүләрен уздыруның үзенчәлекләре, судка кадәр салым бәхәсләрен хәл итү практикасы турында фикер алышу планлаштырыла.