Татарстан Төркмәнстандагы “Аваза” туристик зонасы территориясендә спорт-сәламәтләндерү бөтенсезон чаңгы комплексын төзеячәк

Татарстан Республикасы Төркмәнстандагы “Аваза” милли туристик зонасы территориясендә (Каспий диңгезе яры) спорт-сәламәтләндерү бөтенсезон чаңгы комплексын төзеячәк.
Бу турыдагы карар бүген Премьер-министр Рөстәм Миңнеханов җитәкчелегендәге Татарстан Республикасы рәсми делегациясенең Төркмәнстанга визиты барышында кабул ителде.
Шуны искәртик: Татарстан делегациясе ике көнлек эш визиты белән Төркмәнстанда һәм “Аваза” милли туристик зонасы санатор-курорт объектларының беренче чиратын ачу тантанасында катнаша.
Бүген үк чит ил компанияләренең яңа проект һәм тәкъдимнәрен тәкъдир итү булды. Алар “Аваза” зонасын үстерүгә инвестицияләр кертергә карар кылдылар.
Тәкъдир итү тәмамланганнан соң, Төркмәнстан Президенты Гурбангулы Бердымухамедов 18 га мәйдандагы җир кишәрлеген спорт-сәламәтләндерү бөтенсезон чаңгы комплексы төзелешенә бүлеп бирү турындагы әмергә кул куйды. Бу инвестицион проект кайбер төзелеш компанияләре белән берлектә (“КЭР-Холдинг” компаниясе идарә компаниясе булып тора - www.ker-holding.ru) Татарстан Республикасы тарафыннан тәкъдим ителгән.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов хәбәр иткәнчә, “Аваза” туристик зонасы территориясеннән 18 га мәйдандагы җир кишәрлеген бүлеп бирү турындагы документ Татарстан Премьер-министры Рөстәм Миңнехановка тапшырылган.