Татарстан белгечләре “Роснанотех” дәүләт корпорациясе җитәкчелегенә медицина, фармакология һәм биотехнологияләр өлкәсендәге нанотехнологияләр куллануга бәйле проектларны тәкъдим иттеләр

Бүген Татарстан Республикасы Хөкүмәтенең беренче вице-премьеры Борис Павлов Татарстан Республикасы Министрлар Кабинетында нанотехнологияләр һәм наноиндустрияне үстерү өлкәсендә хезмәттәшлек итү турында “Роснанотех” дәүләт корпорациясе һәм Татарстан Республикасы арасында төзелгән Килешүне гамәлгә ашыру буенча Координация Советының киңәйтелгән утырышын үткәрде.
Киңәшмәдә “Роснанотех” дәүләт корпорациясе генераль директоры урынбасары Андрей Малышев катнашты. Ул, аерым алганда, “Роснанотех”та тематик киңәшмәләр үткәрү практикасына күчүләрен искәртте. Бүгенге утырыш медицина, фармакология һәм биотехнологияләр өлкәсендәге проектларны карауга багышланган.
“Роснанотех”та кайбер өстенлекләр бар, һәм медицина проектлары аеруча әһәмиятлеләрнең берсе булып тора. Шуңа күрә медицина сәнәгате өлкәсендә инвестицияләр кертү буенча махсуслашкан идарә төзү турында карар кабул ителде”, - диде Андрей Малышев.
Малышев әфәнде сүзләренә караганда, бу өлкәдә инде 100 дән артык гариза бирелгән, алар хәзер карап тикшерү стадиясендә. Ике проект инде Күзәтү советы тарафыннан расланган һәм гамәлгә ашырылу стадиясендә тора. Малышев әфәнде 7 нче июльдә Күзәтү советы утырышында нанотехнологияләр куллануга бәйле тагын бер медицина проекты каралачагын әйтте.
“Роснанотех” дәүләт корпорациясе генераль директорының урынбасары бүген гариза һәм проектларның шактый тәртипсез керүен, шул ук вакытта “Роснанотех” ның белгечләр игътибарын социаль әһәмиятле авыруларны профилактикалау һәм аларга каршы көрәшү проблемасына җәлеп итү бурычын да куюын билгеләп үтте. Ул шулай ук медицина өлкәсендәге инновацион проектларның махсус этаплардан торуын искәртте (проектны алга таба коммерцияләштерү өчен, шуларны узарга кирәк).
Татарстан Республикасы Премьер-министрының беренче урынбасары Борис Павлов үзенең чыгышында бүгенге көндә Татарстанда наноиндустрияне үстерү өлкәсендә ниләр эшләнүе һәм медицина, фармакология, биотехнологияләр өлкәсендәге проектлар турында сөйләде.
Татарстан Республикасының сәламәтлек саклау министры Айрат Фәррахов “Татарстан Республикасының хәзерге заман медицинасында инновацион технологияләр куллану турында” дигән доклад белән чыгыш ясады.
Шуннан соң төрле фәнни-тикшеренү институтлары, Ленин исемендәге КДУ кафедралары, КДТУ (технология университеты) һ.б. вәкилләре доклад белән чыгыш ясады (биомедицина һәм биотехнология өчен наноматериаллар җитештерү һәм куллану проектлары, пычрак суларны биологик зарарсызландыру һәм чистарту корылмаларын биосынау технологияләре, химик йогынтыдан саклану өчен махсус кием тегү, наноуглерод нигезендә фильтрлау-сеңдерү материалын сәнәгый җитештерү).
Киңәшмә ахырында Татарстан Республикасы Премьер-министрының беренче урынбасары Борис Павлов Татарстан Республикасы белгечләренең II Халыкара нанотехнологияләр форумында (Мәскәү, 2009 елның 6 нчы – 8 нче октябре) катнашачагын искәртте.