Рөстәм Миңнеханов: “2013 ел Универсиадасына Казанда шәһәр экологиясе мәсьәләләре хәл ителгән булырга тиеш”

Бүген Казанда Татарстан елгаларына пычрак су агызганда табигатьне саклау законнарын үтәү мәсьәләләренә багышланган ведомствоара киңәшмә уза. Әлеге чарада Татарстан Республикасы Премьер-министры Рөстәм Миңнеханов һәм Идел буе төбәкара табигатьне саклау прокуроры Вера Солдатова катнаша.
Татарстан Республикасының хөкүмәт башлыгы кереш сүзендә киңәшмәдә фикер алышуга чыгарылган теманың республикабыз өчен аеруча әһәмиятле булуын билгеләп үтте, чөнки ул әйләнә-тирә мохит торышына бәйле. Премьер-министр сүзләренә караганда, Татарстанда су үткәрү-канализация хуҗалыгын һәм су белән тәэмин итү челтәрләрен үстерүнең 2015 елга кадәр исәпләнгән максатчан программасы эшләнгән. Аны тормышка ашыру өчен, шактый зур (2 миллиард долларга чаклы) капитал кертергә кирәк. 2009 ел әлегә авыр ел булып калса да, хәзер игътибарны зур финанс чыгымнарын түгел, ә оештыру, технология мәсьәләләрен хәл итүне сорый торган чараларга юнәлтергә дә була.
“2013 елга кадәр аз гына вакыт калып бара. Республикабыз һәм Казан чит ил кунакларын кабул итәчәк. Нинди генә очракта да, башкалабыз һәм республикабызның тышкы күренеше лаеклы булырга тиеш. Бүген бергә хәл итәсе мәсьәләләр шактый күп әле”, - дип ассызыклап үтте Рөстәм Миңнеханов.
Шуларның берсе – яңгыр суларын җыю һәм аларны Казан территориясеннән читкә җибәрү. Бу суларның миллионлаган кубометры бернинди чистартусыз Идел һәм Казансуга агып төшә. Россия Кулланучылар күзәтчелеге органнарыннан алынган мәгълүматларга караганда, Татарстан башкаласында яңгыр яуганнан соң, яңгыр суларын үзенә җыя торган елгалар суының сыйфаты кинәт кими башлый. Шәһәрдә яңгыр суларын җыю канализацияләре дә җитәрлек түгел. 2008 елда Казан үзәген баскан яңгыр сулары проблеманың кискенлеген аермачык күрсәтте.
Татарстанның төбәктәге икътисади хәлне яхшырту буенча зур эш башкаруына да игътибар итәргә кирәк. Республика бюджеты акчасына чистарту корылмаларын капиталь төзү һәм төзекләндерү эше алып барыла. Ләкин бу акча һәрвакытта да нәтиҗәле кулланылмый, әлеге эшләрнең заказчысы аларны башкару сыйфатын кайчагында тиешенчә контрольдә тота алмый.