Казанда реконструкциядән соң Ак.Павлов урамы юлы ачылды

Бүген Казанның Авиатөзелеш районында реконструкциядән соң Академик Павлов урамы юлы ачылды. Тантаналы чарада ТР Премьер-министры Илдар Халиков, ТР транспорт һәм юл хуҗалыгы министры Ленар Сафин, Казан Башкарма комитеты җитәкчесе Денис Калинкин, Казанның Авиатөзелеш һәм Яңа Савин районнары хакимияте башлыгы Тимур Алибаев, «Главтатдортранс» ДКУ директоры Эдуард Данилов катнашты.

“Бу урамны реконструкцияләү тарихы Татарстан Президенты Рөстәм Миңнехановның Казан вертолет заводы эшчеләре белән очрашуыннан башланды. Ул шул вакытта урамны төзекләндерергә вәгъдә иткән. Без, дәүләт заказчысы буларак, шул ук көнне диярлек реконструкция ясау буенча йөкләмә алдык һәм икенче көнне үк эшкә керештек”, - дип сөйләде «Главтатдортранс» ДКУ директоры Эдуард Данилов журналистларга.

Бу урам юлын реконструкцияләү эшләре 12 августта башланды һәм 10 октябрьдә тәмамланды, шулай итеп, эш ике ай дәвам итте. “Бу урамның гомуми озынлыгы – 1,3 км, асфальт өслеге – 27,4 мең кв метр, – диде Э. Данилов. – Урамны яңадан реконструкцияләделәр, юл катламы тулысынча алыштырылды. 2600 метр озынлыктагы трамвай юлы алыштырылды, ул да авария хәлендә иде. Шулай ук 6 мең кв. метр чамасы тротуар төзекләндерелде”. «Главтатдортранс» ДКУ директоры сүзләренә караганда, реконструкцияләү эшләре өчен чыгымнар 136,4 млн сум тәшкил иткән. Шулай ук бу урам буенча машиналар күп йөрүе сәбәпле, даими зур бөкеләр хасил була иде, дип белдерде белгеч. Юл начар хәлдә иде, ремонт эшләре 20 ел чамасы үткәрелмәгән. “Якындагы 10 елда биредә ремонт кирәк булмаячак”, - дип ышандырды ул.

Казан Башкарма комитеты җитәкчесе Денис Калинкин Татарстан Президентына һәм ТР Хөкүмәтенә рәхмәт белдерде. “Авыр вакыт булуга карамастан, быел Казанга 1,3 млрд сум акча бүлеп бирелде, һәм без, юл хуҗалыгы үсешенә этәргеч биргән Универсиададан соң да, шәһәр юлларын капиталь ремонтлау темпларын киметмичә эшне дәвам итә алдык”, - диде ул.

ТР Премьер-министры Илдар Халиков барлык юл хуҗалыгы хезмәткәрләрен якынлашып килүче һөнәри бәйрәмнәре белән котлады. “Универсиадага әзерлек вакытында юлларны тәртипкә китерү һәм яңаларын төзү буенча куелган бурычларны үти алуыгыз өчен рәхмәт белдерәм. Быел таләпләр артуга карамастан, эш күләме кимемәде, эшләрне төгәл срокта һәм сыйфатлы башкарасыз”, - дип билгеләп үтте ул. И. Халиков сүзләренә караганда, реконструкциядән соң ачылган юл, бу районда яшәүчеләр өчен күптән көтелгән вакыйга.

Соңыннан кунаклар ТР Министрлар Кабинеты һәм Казан мэры Рәхмәт хатларын тапшырдылар һәм ремонтланган юлда хәрәкәтне ачып җибәрүгә символик старт бирделәр.