Татарстан халкы мобиль кушымта аша юл хәрәкәте кагыйдәләрен бозучылар турында хәбәр итә ала

Татарстан халкы юл хәрәкәте кагыйдәләрен бозулар турында махсус “Инспектор” кушымтасы аша хәбәр итә алачак, аны 10 ноябрьдән iOS һәм Android операцион системалар базасында мобиль җайланмаларга түләүсез урнаштырырга мөмкин булачак.

“Кушымта юлларда җәмәгать контролен булдыру, юл хәрәкәте иминлеген яхшырту өчен эшләнде”,- дип хәбәр итте ТР Министрлар Кабинетында узган брифингта ТР мәгълүматлаштыру һәм элемтә министры Роман Шәйхетдинов.

Үз чиратында, ТР буенча Эчке эшләр министрлыгының ЮХИДИ идарәсе башлыгы Рифкать Миңнеханов, бу кушымта юл хәрәкәте кагыйдәләрен бозуның шаһитләре булган җәяүлеләр һәм транспорт чаралары пассажирлары өчен генә билгеләнгән, дип ассызыклады.

Роман Шәйхетдинов сүзләренчә, мобиль кушымтаны булдыруның инициаторлары – Татарстанда Россия автомобиль хуҗалары федерациясе һәм Татарстан Дәүләт автоинспекциясе. Кушымтаны проектлаштыру 3 айдан артыкка сузылган.

Кушымта ярдәмендә теркәлгән тәртип бозулар республиканың Мәгълүмат технологияләре үзәгенең контакт-үзәгенә җибәреләчәк. Анда тикшерүләрдән соң, материал ЮХИДИ район бүлекләренә җибәрелә, анда каралганнан соң, протокол төзү кирәклеге турында карар кабул ителәчәк.