Татарстанда ел дәвамында күрсәтелгән электрон хезмәтләр саны 18%ка арткан

Татарстан халкы дәүләт һәм социаль әһәмиятле булган хезмәтләрне электрон ысул белән алуны уңайлырак күрә. Бу хакта бүген журналистларга ТР Министрлар Кабинетында узган брифингта ТР мәгълүматлаштыру һәм элемтә министры Роман Шәйхетдинов хәбәр итте.

Роман Шәйхетдинов сүзләренчә, агымдагы елның 9 аенда якынча 22млн хезмәт күрсәтелгән. “2013 ел белән чагыштырганда күрсәтелгән хезмәтләрнең саны 18%ка арткан”, -дип белдерде ул.

Түләүләр статистикасы буенча аларның күпчелеге юлларда тәртип бозган өчен штрафлар (якынча 45%) һәм ТКХ хезмәтләре өчен түләүләр (35%).

Соңгы өч айда дәүләт хезмәтләре порталында балаларга өстәмә белем бирү кысаларында түгәрәкләр һәм секцияләр өчен түләү, газета һәм журналларга язылу мөмкинлеге булдырылды.

Искә төшерәбез, бүгенге көнгә дәүләт һәм муниципаль хезмәтләр Татарстан Республикасында өч ысул белән күрсәтелә: мәгълүмат терминаллары – инфоматлар аша, Татарстан Республикасының дәүләт һәм муниципаль хезмәтләр порталы аша (uslugi.tatarstan.ru) һәм “ТР хезмәтләре” мобиль кушымта ярдәмендә.