Татарстанда зыян китерә торган предприятиеләр эшчәнлеген бәяләү һәм аларның вакытыннан алда бөлгенлеккә төшүен кисәтү комиссиясе төзеләчәк

Татарстан Республикасында түләргә сәләтсез һәм зыян китерә торган предприятиеләр эшчәнлеген бәяләү һәм аларның вакытыннан алда бөлгенлеккә төшүен кисәтү комиссиясе төзеләчәк. Бүген Татарстан Республикасы Министрлар Кабинетында узган киңәшмәдә комиссия составына кайсы структураларның вәкилләре керәчәге һәм бөлгенлеккә төшүне кисәтү процедураларын куллануның нәтиҗәлелеген арттыру турында сүз барды. Аны Татарстан Республикасының хөкүмәт башлыгы Рөстәм Миңнеханов үткәрде.
Киңәшмәдә Татарстан Республикасы Хөкүмәтенең беренче вице-премьеры Равил Моратов, Татарстан Республикасының икътисад министры Марат Сафиуллин, Татарстан Республикасының сәнәгать һәм сәүдә министры Равил Зарипов, Федераль салым хезмәтенең Татарстан Республикасындагы идарәсе җитәкчесе Марат Сафиуллин, Татарстан Республикасы Предприятиеләр һәм эшмәкәрләр ассоциациясе башлыгы Александр Лаврентьев һәм башкалар катнашты.
Киңәшмәне ачып, Татарстан Республикасы Премьер-министры шуны хәбәр итте: кризис шартларында производство-хуҗалык эшчәнлегенә оператив мониторинг ясау һәм ситуацияне профильле министрлыклар дәрәҗәсендә анализлау гына түләргә сәләтсез предприятиеләрнең киләчәктә эшләвен тәэмин итә һәм аларны вакытыннан алда бөлгенлеккә төшүдән, хәтта рейдерларның тартып алуыннан саклап кала алачак.
Рөстәм Миңнеханов сүзләренә караганда, республиканың язмышын хәл итә торган предприятиеләр дә бар. Ул республикада Татарстан икътисады өчен аеруча әһәмиятле булган предприятиеләр исемлеге төзелүен искәртте (анда 736 предприятие кертелгән). Хәзер бу исемлеккә төгәллек кертергә кирәк.
Татарстан Республикасы Премьер-министры бөлгенлек хәлендәге предприятиеләрнең 50 процентын – авыл хуҗалыгы предприятиеләре, 13 процентын төзелеш һәм торак-коммуналь хуҗалык тармагы предприятиеләре, 10 процентын сәүдә һәм сәнәгать тармагы предприятиеләре алып торуын әйтте.
Кайчагында бөлгенлек процедурасы аңлы рәвештә сузыла һәм, ахыр чиктә, предприятиеләр өчен нәтиҗәсез эшкә әйләнә. Татарстан Республикасының хөкүмәт башлыгы фикеренчә, моннан, иң беренче чиратта, предприятие коллективлары һәм дәүләт яки муниципалитетлар аша күрсәтелгән хосусый милек ияләре зыян күрә.
Рөстәм Миңнеханов зур уңышка ирешкән һәм өлгереш күрсәтә алмаган арбитраж идарәчеләр исемлеген төзеп бастырып чыгарырга һәм бөлгенлек процедурасындагы предприятиеләрдә дәүләт вәкилләренә аттестация үткәрергә тәкъдим итте.
Татарстан Республикасы Премьер-министры ярдәмчесе Мидхәт Шаһиәхмәтов предприятиеләрнең бөлгенлеккә төшүен кисәтү чаралары турындагы тәкъдимнәр белән чыгыш ясады. Аерым алганда, ул финанс кризисы шартларында предприятиеләргә ярдәм итүнең судтан тыш механизмнарын кулланырга тәкъдим итте. Моннан тыш, предприятиеләр бөлгенлек процедурасына керә башлаганчы ук, аларны реабилитацияләү чараларын кулланырга уйлыйлар.
Предприятиеләрнең вакытыннан алда бөлгенлеккә төшүен кисәтү комиссиясе составына Татарстан Республикасы Җир һәм милек мөнәсәбәтләре министрлыгы, Татарстан Республикасы Финанслар министрлыгы, Татарстан Республикасы Министрлар Кабинеты каршындагы Икътисади һәм социаль тикшеренүләр үзәге белгечләре һәм профильле министрлыкларның министр урынбасарлары керәчәк.
Комиссия үзе Республика ведомствоара комиссиясенең эш органы булачак. Аңа Татарстан Республикасы Хөкүмәтенең беренче вице-премьеры Равил Моратов җитәкчелек итәчәк.
Татарстан Республикасы Премьер-министры Рөстәм Миңнеханов әлеге комиссиянең төп бурычы предприятиеләрнең бөлгенлеккә төшүен тикшерү түгел, ә аларның хәлен яхшырту механизмнарын эзләү икәнлеген аеруча билгеләп үтте.
Киңәшмәдә Федераль салым хезмәтенең Татарстан Республикасындагы идарәсе җитәкчесе Марат Сафиуллин, Татарстан Республикасы икътисад министрының беренче урынбасары – Икътисади һәм социаль тикшеренүләр үзәге директоры Алевтина Кудрявцева чыгыш ясады.