Илдар Халиков 2015 елда БДИга әзерлек буенча округ киңәшмәсендә катнашты

Түбән Новгородта РФ Президентының Идел буе федераль округындагы Тулы вәкаләтле вәкиле Михаил Бабич һәм Россия мәгариф һәм фән өлкәсендә күзәтчелек хезмәте җитәкчесе Сергей Кравцов 2015 елда Бердәм дәүләт имтиханына әзерлек буенча округ киңәшмәсен уздырдылар.

Киңәшмә Идел буе федераль округы төбәкләре белән видеоконференцэлемтә режимында узды. Бу чарада Татарстаннан ТР Премьер-министры Илдар Халиков, ТР буенча баш федераль инспектор Ренат Тимерҗанов, ТР мәгариф һәм фән министрының беренче урынбасары Андрей Поминов катнашты.

Киңәшмә барышында 2014 елда БДИ нәтиҗәләре буенча проблемалы мәсьәләләр, шулай ук белем бирү сыйфатын күтәрү, шул исәптән гомуми белем бирү мәктәпләрендә рус телен укыту мәсьәләләре буенча фикер алышуга аерым игътибар ителде.

Михаил Бабич билгеләгәнчә, бүген БДИ өчен гадел булмаган баллар куюны бетерү, бу системада тәртип урнаштыру мөһим. Аның сүзләренчә, укучылар өчен Мәскәү һәм Санкт-Петербург вузларында югары белем алу мөмкинлеген күтәрергә кирәк.

Киңәшмәдә декабрьдә 2014-2015 елларда БДИ тапшыру буенча кампания башланачак дип, хәбәр ителде, беренче тапкыр Россия Президенты карары буенча чыгарылыш сыйныф укучылары инша язачак. Чыгарылыш иншасы өчен ике билге каралган – “зачет” һәм “зачет түгел”. Укучылар инша өчен “зачет” алмыйча Бердәм дәүләт имтиханына кертелми. Иншаны кабат язу февраль-март айларында оештырылачак.