“Казанда 2013 елгы XXVII Бөтендөнья җәйге универсиадасын үткәрү башкарма комитеты” коммерцияле булмаган автономияле оешмасы төзелде

Бүген Татарстан Республикасы Премьер-министры Рөстәм Миңнеханов “Казанда 2013 елгы XXVII Бөтендөнья җәйге универсиадасын үткәрү башкарма комитеты” коммерцияле булмаган автономияле оешмасы Күзәтчелек советы утырышында һәм бу советны оештыручыларның гомуми җыелышында катнашты.
Утырыш Россия Федерациясенең Спорт, туризм һәм яшьләр сәясәте министрлыгында (Мәскәү) узды. Аны Россиянең Спорт министрлыгы башлыгы Виталий Мутко үткәрде.
Әлеге чара барышында “Казанда 2013 елгы XXVII Бөтендөнья җәйге универсиадасын үткәрү башкарма комитеты” коммерцияле булмаган автономияле оешмасын төзү турында карар кабул ителде. Яңа оешманың генераль директоры итеп Владимир Леонов билгеләнде.
Күзәтчелек советы Универсиада башкарма дирекциясенең югары идарә итү органы булачак. Оештыручылар җыелышында Күзәтчелек советы рәисе итеп - Россиянең спорт, туризм һәм яшьләр сәясәте министры Виталий Мутко, рәис урынбасары итеп Татарстан Премьер-министры Рөстәм Миңнеханов сайланды.
Күзәтчелек советы составына статс-сәркатип – Россия Федерациясе спорт, туризм һәм яшьләр сәясәте министрының урынбасары, Казанда 2013 елгы XXVII Бөтендөнья җәйге универсиадасын әзерләү һәм үткәрүне оештыру комитетының җаваплы сәркатибе Наталья Паршикова, Татарстан Республикасының яшьләр эшләре, спорт һәм туризм министры Марат Бариев, Казан мэры Илсур Метшин, Казан шәһәре муниципаль берәмлеге башлыгының беренче урынбасары Иршат Минкин, Россия студентлар спорт союзы (РССС) президенты Олег Матыцин һәм РССС башкарма комитеты әгъзасы Виктория Черкесова керде.
Утырыш кысаларында коммерцияле булмаган автономияле оешма уставы, дирекциянең оештыру структурасы һәм аның 2009 елга эш планы расланды.
Утырыш тәмамлангач, Татарстан Республикасы яшьләр эшләре, спорт һәм туризм министры Марат Бариев Күзәтчелек советы әгъзаларының Универсиада башкарма дирекциясе эшенең бөтен стратегик юнәлешләрен билгеләячәген әйтте. Моннан тыш, Күзәтчелек советы яңа структураның халыкара спорт оешмалары һәм башка Бөтендөнья студентлар уеннарының оештыру комитетлары белән үзара ярдәм итешеп эшләвенә дә ярдәм итәчәк.