Казанда Казакъстан Республикасының Милли иминлек комитеты һәм Россиянең Наркотиклар әйләнешенә күзәтчелек буенча Федераль хезмәте арасында 2015 елга Уртак чаралар планы имзаланды

Бүген Татарстан Республикасы Хөкүмәте йортында (Казан, Ирек мәйданы, 1) Казакъстан Республикасының Милли иминлек комитеты һәм Наркотиклар әйләнешенә күзәтчелек буенча Россия Федерациясе Федераль хезмәте (ФСКН) арасында 2015 елга Уртак чаралар планы имзаланды. Документка ФСКН директоры урынбасары Николай Аулов һәм Казакъстан Республикасының Милли иминлек комитеты рәисе урынбасары Самат Абиш имзаларын куйды. Бу тантанада Татарстан Республикасы Премьер-министры Илдар Халиков катнашты.

Кыскача сәламләү сүзе белән Николай Аулов чыгыш ясады. Ул, аерым алганда, Казакъстаннан килгән хезмәттәшләренә законсыз наркотиклар әйләнеше мәсьәләләре буенча актив эшләүләре өчен рәхмәт белдерде. Ике яктан да катнашучылар киләчәктә наркотиклар әйләнешенә күзәтчелек өлкәсендә уңышлы хезмәттәшлекне ныгыту мәсьәләләре хакында фикер алыштылар. Очрашу кысаларында 2014 елда уртак эшләрнең нәтиҗәләре каралды, Россия Федерациясе һәм Казакъстан Республикасы территориясенә наркотиклар үтеп керүне бетерү чаралары эшләнде.

Үз чиратында Илдар Халиков хәбәр иткәнчә, Татарстанда законсыз наркотиклар әйләнеше белән көрәшкә җитди игътибар бирелә. Законсыз наркотиклар әйләнеше мәсьәләсенең актуальлеге соңгы вакытта туристлар агымының артуына бәйле рәвештә дә үсә. Быел Казанга, алдан фаразлау буенча, якынча 2 млн. турист киләчәк. Бу шатландыра да, шулай ук хокук саклау органнарына, шул исәптән наркотиклар күзәтчелеге хезмәткәрләренә эш арта.