Татарстанда ел башыннан 175 мең литр легаль булмаган алкоголь әйләнештән алынган

Ел башыннан Татарстанда 175 мең литр легаль булмаган алкоголь һәм спиртлы эчемлек әйләнештән алынган, шул исәптән 44 мең л Казакъстаннан, 51 мең л исерткеч Төньяк Осетиядән кертелгән. Бу хакта бүген ТР Хөкүмәте йортында узган брифингта Татарстан Республикасы буенча эчке эшләр министры урынбасары – полиция башлыгы Рафаил Гыйльманов хәбәр итте.

ТР Дәүләт алкоголь инспекциясе белгечләре уздырган контроль һәм административ тикшерү чаралары барышында легаль булмаган 75 мең л алкоголь законсыз әйләнештән алынган, дип сөйләде ТР Дәүләт алкоголь инспекциясе җитәкчесе Игорь Марченко.

“Соңгы елларда легаль алкоголь сату күләмнәренең кимүе күзәтелә. Бу Татарстанга гына түгел, тулаем Россиягә дә кагыла”, - дип белдерде И. Марченко. Аның сүзләреннән аңлашылганча, моның сәбәбе халык тарафыннан алкоголь эчемлекләр куллануны киметүгә йөз тоткан программада гына түгел, ә легаль булмаган әйләнеш артуында да. Ягъни, халык аз эчә башлады, дип куанырга иртәрәк, сәбәпнең ялган юл белән үтеп кергән арзанлы аракы белән мавыгуда булуы ихтимал, дип саный Игорь Марченко.

Рафаил Гыйльманов сүзләренчә, агымдагы елның 11 аенда Татарстан Республикасы эчке эшләр органнары алкоголь базары объектларында 30 мең 190 тикшерү үткәргән, шул исәптән якынча 14 мең автотранспорт тикшерелгән. Нәтиҗәдә, 11 ай эчендә 111 җинаять ачыкланган, 101 зат җинаять җаваплылыгына тартылган. Оператив чаралар уздыру барышында, Казакъстан, Киров һәм Ульяновск өлкәләреннән законсыз төстә алкоголь кертү белән шөгыльләнгән 8 канал ябылган. Алкоголь продукциясен балигъ булмаганнарга сату очраклары буенча 16 җинаять эше кузгатылган. Алкоголь продукциясен җитештерү белән шөгыльләнгән өч законсыз производство ябылган, аларның икесендә эчемлекләр “Татспиртпром” товар билгесе астында җитештерелгән булган. Төньяк Осетиядән спиртлы эчемлекләр кертү белән мәшгуль булган өченче яшерен цех әле якын арада гына фаш ителгән һәм аның эшчәнлегенә чик куелган.

ТР Дәүләт алкоголь инспекциясе инициативасы буенча, “ВКонтакте” социаль челтәре җитәкчелеге тарафыннан Татарстан территориясенә алкоголь кертү белән мәшгуль булган 150 ләп төркемгә киртә куелган. Алкоголь продукциясен төнлә һәм өйгә үк китереп бирү белән шөгыльләнгән 147 сайтны да ябу турында суд карарлары бар, ди Игорь Марченко. Докладчы әйтүенчә, дәүләт пошлинасы күләме югары , ә штраф санкцияләре түбән булганлыктан, исерткеч эчемлекләрне лицензиясез сату очраклары әле һаман теркәлә. 2014 нче елның 11 аенда шундый 200 очрак ачыкланган, былтыр мондый 164 факт теркәлгән булган.

Игорь Марченко билгеләп үткәнчә, Татарстан Президенты йөкләмәсе буенча, декабрь ае легаль булмаган алкогольне ачыклауга, исерткеч эчемлекләрнең законсыз әйләнешенә чик куюга багышлана.