Татарстанның 40 меңнән артык шәхси эшмәкәре Пенсия фондына бурычлы

Татарстанда бүгенге көнгә 41 мең шәхси эшмәкәр Пенсия фондына 1,7 млрд сумга бурычлы. Предприятиеләрнең фондка бурычы 2,6 млрд сум тәшкил итә. Бу мәгълүматны бүген ТР Министрлар Кабинетында узган брифингта РФ Пенсия фондының ТР буенча бүлеге идарәчесе Марсель Имамов хәбәр итте.

Аның сүзләренчә, 2015 елда эш бирүчеләр айның 15еннән соңга калмыйча отчет бирергә тиешләр. Әгәр эш бирүче отчетын электрон рәвештә җибәрсә, биш көнгә соңрак та бирә ала, ләкин 20сеннән соңга калмыйча.

2015 елдан шулай ук шәхси эшмәкәрләр тарафыннан түләнә торган иминият взносының билгеләнгән күләме белән дә үзгәрешләр булачак. Марсель Имамов искәрткәнчә, билгеләнгән түләүнең күләме минималь хезмәт хакы күләменә бәйле. 2015 елның 1 гыйнварыннан ул айга 5 мең 965 сум тәшкил итәчәк. Шуңа бәйле Пенсия фондына шәхси эшмәкәрләр өчен взносның билгеләнгән күләме елга 18 мең 610 сум 80 тиен тәшкил итәчәк, ә мәҗбүри медицина иминиятләштерүе өчен – 3 мең 650 сум 58 тиен.

“Үз эшләрен ябарга планлаштырган эшмәкәрләр, агымдагы елның 31 декабренә кадәр мәҗбүри пенсия иминиятләштерүенә 17,3 мең сум һәм мәҗбүри медицина иминиятләштерүенә 3,4 мең сум түләргә тиешләр, шулай ук Пенсия фонды органнары пеня салмасын өчен салым хезмәтенә декларация бирергә тиеш”, - дип аңлатты Марсель Имамов.