Илдар Халиков "Татспиртпром" Директорлар советы утырышын уздырды

Бүген Казанда ТР Хөкүмәте йортында Татарстан Премьер-министры Илдар Халиков рәислегендә "Татспиртпром" ААҖ Директорлар советының чираттагы утырышы узды. Көн тәртибендәге төп мәсьәләләр – 2014 ел өчен компаниянең финанс-хуҗалык эшчәнлегенең башлангыч нәтиҗәләре турында, 2015 елга планлаштырылган продукция җитештерү турында.

Директорлар советы әгъзалары компаниянең финанс директоры Әлфия Каюмованың 2014 елда "Татспиртпром" ААҖнең финанс-хуҗалык эшчәнлегенең башлангыч нәтиҗәләре турындагы докладын тыңлады.

2014 елда "Татспиртпром" ААҖнең алкоголь продукциясе 7,9 млн декалитр тәшкил итә, 2013 ел белән чагыштырганда җитештерү күләме - 16 %ка, ә 2012 елга караганда 12 %ка кимегән.

2014 елда "Татспиртпром" ААҖ филиаллары һәм "Алкоторг" ҖЧҖ аша сатылган алкоголь продукциясенең гомуми күләме 7,6 млн декалитр тәшкил итә.

РФ төбәкләренә филиаллардан һәм "Алкоторг" ҖЧҖ аша сатылган алкоголь продукциясе күләме 2014 елда 4,6 млн декалитр тәшкил итә.

"Татспиртпром" ААҖ спирт заводлары (Мамадыш, Усад) тарафыннан 2014 елда 1,7 млн декалитр ректификацияләнгән спирт җитештереләчәк, ул үзләрендә алкоголь продукциясе эшләүдә кулланыла.

2014 елда "Татспиртпром" ААҖ бөтен дәрәҗә бюджетларга 18,7 млрд сум салым һәм җыем түли, 2013 ел белән чагыштырганда үсеш - 11 процент. Акциз 15,1 млрд сум тәшкил итәчәк яисә 81%.
ТРның консолидацияләнгән бюджетына 2014 елда 6,4 млрд сум акча керәчәк.

"Татспиртпром" ААҖ генераль директоры Гиоргий Куприянов 2015 елда планлаштырылган продукция җитештерү турында доклад ясады.

Утырыш нәтиҗәләре буенча "Татспиртпром" ААҖ Директорлар советы отчет чорына җәмгыятьнең финанс-хуҗалык эшчәнлеген уңай бәяләде.