ТР Премьер-министры Илдар Халиков Россия Үзәк банкы рәисенең беренче урынбасары Сергей Швецов белән очрашты

Татарстан Республикасы Премьер-министры Илдар Халиков һәм Россия Үзәк банкы рәисенең беренче урынбасары Сергей Швецов бүгенге очрашуда киләчәктә хезмәттәшлек мәсьәләләре турында фикер алыштылар.

Очрашу Татарстан Республикасы Хөкүмәт йортында узды, анда ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов, ТР икътисад министры Артем Здунов, РФ Үзәк банкының Идел-Нократ баш идарәсе башлыгы урынбасары – РФ Үзәк банкының ТР буенча Милли банкы бүлеге идарәчесе Мидхәт Шаһиәхмәтов катнашты.

Без күп мәсьәләләр буенча хезмәттәшлек итәргә, аерым алганда, мәгълүмат технологияләре өлкәсендә, шул исәптән ресурслар һәм кадрлар белән ярдәм итәргә әзер, диде Илдар Халиков.
ТР Министрлар Кабинеты башлыгы билгеләгәнчә, бүген мәгълүмат технологияләрен кулланмыйча гына көндәшлеккә сәләтле булу, нәтиҗәле эшләү мөмкин түгел. Без уртаклык табарбыз, дигән ышаныч белдерде ул.

Сергей Швецов, РФ Үзәк банк вәкилләре Казанда югары технологияләр технопаркы - IT-паркта, дата-үзәктә булдылар, “Ачык Татарстан”, “Электрон документ әйләнеше”, шулай ук мобиль кушымталар проектлары белән таныштылар, дип сөйләде.

Очрашу барышында Илдар Халиков электрон документ әйләнеше, электрон хисап системаларын куллануның өстенлекләре турында сөйләде.