2015 елгы дөнья чемпионатына әзерлек кысаларында 4 сынау ярышы уздырылачак

Спортның су төрләре буенча дөнья чемпионаты программасына Казанда беренче тапкыр яңа дисциплиналар кертеләчәк. Бу хакта бүген журналистларга ТР Министрлар Кабинетында узган брифингта ТР яшьләр эшләре һәм спорт министры Владимир Леонов хәбәр итте.

Министр сүзләренчә, барлык дисциплиналар буенча чемпионатның расписаниесе тулысынча расланган.

В.Леонов билгеләгәнчә, чемпионатның программасына беренче тапкыр 4 яңа дисциплина кертеләчәк,ул шуның белән уникаль. Синхрон йөзүдә – катнаш дуэтларның техник һәм ирекле программалары. Суга сикерүдә – 10 метр биеклектән һәм 3 м биеклектәге трамплиннан катнаш сикерү.

Спортның барлык төрләре буенча ярышларның директорлары билгеләнгән. 232 техник рәсми зат билгеләнгән (судьялар). Шуларның 150се халыкара судьялар, 82се милли судьялар. Чемпионатка әзерлек барышында 8 сынау ярышы үткәрелгән, тагын 4 сынау ярышын уздыру планлаштырыла. Алар арасында: 17-19 апрельдә – “Мастерс” категориясендә йөзү буенча Россия чемпионаты, 20-26 апрельдә – суга сикерү буенча халыкара ярышлар, 15-25 июньдә – ир-егетләр командалары арасында суда туплы уен буенча халыкара турнир, 15 июльдә - ачык суда йөзү буенча ярышлар.

Чемпионатны уздыру өчен 8 объект файдаланылачак: Kazan-arena, Спортның су төрләре сарае, Казансу елгасы, суда туплы уен өчен арена, “Буревестник”, “Олимп”, “Акчарлак”, “Оргсинтез” йөзү бассейннары.

В.Леонов билгеләгәнчә, чемпионатка билетлар сату уңышлы бара. Бүгенгә 27 мең 157 билет сатылган. Шуларның күпчелек өлеше интернет челтәре аша сатылган. Йөзү, синхрон йөзү, хай-дайвинг кебек спорт төрләре зур популярлыкка ия, сату планы буенча июль башына билетларның 80 процент өлеше сатылып бетелергә тиеш.