Минтимер Шәймиев: “Без тарихи комплексларны яңадан торгызуда фәннең әһәмиятен аңладык”

Бүген Казанда “Зөянең Успение соборын һәм Троица чиркәвен, Зөя территориясен һәм буфер зонасын саклау һәм идарә итү” халыкара семинары башланды. Аны Татарстан һәм Россия Мәдәният министрлыклары ТР тарихи һәм мәдәни ядкәрләрне яңадан торгызу республика фонды белән бергә оештырды. Оештыручылар арасында шулай ук Казан федераль университеты, Казан дәүләт мәдәният һәм сәнгать институты, ТР ФАнең А.Халиков исемендәге археология институты, “Зөя утрау-шәһәрлеге” тарих-архитектура һәм сәнгать музее, Россия тарих җәмгыяте бар.

Семинарның тантаналы ачылышында ТР Дәүләт Киңәшчесе, “Яңарыш” республика фонды Попечительлек советы рәисе Минтимер Шәймиев, ТР мәдәният министры Айрат Сибагатуллин, ТР Дәүләт Советы рәисе урынбасары, “Яңарыш” республика фондының башкарма директоры Татьяна Ларионова, РФ Мәдәният министрлыгының мәдәни мирасны дәүләт саклау департаменты консультанты Надежда Филатова, ИКОМОС эксперты, Демокрит университеты(Греция) профессоры Препис Алкивиадис катнашты.

Семинарда катнашучыларны Минтимер Шәймиев сәламләде.
“Үзебезнең мирасыбызны торгызу белән шөгыльләнүче бердәм команда бар. Хәзер безнең белән халыкара экспертларның хезмәттәшлек итүе мөһим. Бүген Татарстанда яхшы дәрәҗәдәге белгечләр төркеме бар, объектларда, барыннан да элек, Россиядә эшләү буенча белемнәре, тәҗрибәләре белән ярдәм итә алалар”, - дип билгеләде ул.
Минтимер Шәймиев Бөтендөнья мирас исемлегенә кертелгән Болгар белән зур юл үтелгәнен искә төшерде. “Бу - бик яхшы мәктәп, бу юлда без үзебез дә үстек һәм үсүебезне дәвам итәбез”.
Болгар ядкәрләре буенча эш өчен Минтимер Шәймиев рәхмәт белдерде. “ Бу безнең уртак хезмәтебез һәм мин сезгә безнең эшчәнлегебезнең беренче нәтиҗәләре өчен рәхмәт белдерәм”, - диде ул.

Болгарда һәм Зөядә зур эш башкарылды, беренче чиратта, инфраструктура булдырылды, дип искәртте ТР Дәүләт Киңәшчесе. Хәзер дә төзекләндерү эшләре дәвам итә. “Хәзер без Зөяне ЮНЕСКО бөтендөнья мирасы исемлегенә кертү буенча эшлибез. Россия һәм чит ил экспертлары белән киңәшләштек. Экспертлар күзлегеннән Зөя утрау-шәһәрлегенең Успение соборы һәм Троица чиркәве җәлеп итәрлек дип танылды”, - дип ассызыклады ул.
“Без мәдәни мирас белән идарә итү мәсьәләләренә җитди игътибар бирергә тиеш. Бөтендөнья мирас исемлегенә кертелү – бөтен җаваплылыкны ЮНЕСКОга бирү дигәнне аңлатмый: без үзебез саклау, оештыру һәм пропаганда өчен җавап бирергә тиеш. Яшь буынга мәдәни-тарихи объектларны төзек килеш тапшыру өчен без бу эшләрне тагын да зур җаваплылык белән дәвам итәргә бурычлы”, - дип билгеләде Минтимер Шәймиев.

Алга таба РФ Мәдәният министрлыгының мәдәни мирасны дәүләт саклау департаменты консультанты Надежда Филатова чыгыш ясады.

ИКОМОС эксперты, Демокрит университеты профессоры Препис Алкивиадис яңадан торгызу һәм тарихи үзәкләр белән идарә итү проблемалары турында сөйләде.

Халыкара семинар ике көн була, иртәгә семинарның сессиясе “Зөя утрау-шәһәрлеге” музееның конференцияләр залында узачак. Катнашучылар шулай ук утрау-шәһәрлекнең тарихи-архитектура ядкәрләрен караячаклар.