Илдар Халиков: Мөхәммәт Сабировның исеме мәңгегә безнең республика тарихына язылачак

Бүген “Казан” милли-мәдәни үзәгендә Татарстан Республикасының элекке Премьер-министры Мөхәммәт Сабировны соңгы юлга озатуга багышланган матәм митингы узды. Республиканың күренекле җәмәгать һәм сәясәт эшлеклесе Мөхәммәт Сабиров 2015 елның 9 нчы мартында, 83 нче яшендә вафат булды. Аның белән хушлашырга ТР Дәүләт Киңәшчесе Минтимер Шәймиев, Татарстан Премьер-министры Илдар Халиков, республиканың сәяси һәм фәнни эшлеклеләре һәм башкалар катнашты.

Хушлашу чарасында Илдар Халиков ТР Президенты һәм республика җитәкчелеге исеменнән Мөхәммәт Сабировның туганнары һәм якыннарының кайгысын уртаклашты. “Мөхәммәт Галләм улы күренекле һәм талантлы кеше иде. Ул һәрвакыт республиканың һәрбер кешесе өчен, бөтен республика өчен кайгыртучанлыгы белән аерылып торды”, - дип билгеләде ул.

Илдар Халиков Мөхәммәт Сабировның хезмәт эшчәнлегенең төп этаплары турында сөйләде. 1955 елда Уфа нефть институтын тәмамлаганнан соң, ул “Әлмәтбораулаунефть” трестында эшли башлый, югары профессионализм, компетентлык, оештыру сәләте кебек сыйфатлар аны хуҗалык эшләреннән дәүләт хезмәтенә кадәр китереп җиткергән.

1989 елда Мөхәммәт Галләм улы ТАССР Министрлар Советын җитәкләде, 1991-1995 елларда республика Хөкүмәте белән җитәкчелек итте. “Ул вакытта аның ни дәрәҗәдә физик һәм мораль авырлык кичергәнен фаразлап кына буладыр. Бу илнең таркалу, яңа икътисад формалашу, халыкның яшәү дәрәҗәсе түбәнәю чоры иде. Мөхәммәт Галләм улы бу чорның авырлыкларын намус белән кабул итте”, - дип ассызыклады Илдар Халиков.

Хезмәттәге казанышлары өчен Мөхәммәт Сабиров югары дәүләт бүләкләренә лаек булган. Ул ике Хезмәт Кызыл Байрагы ордены, “Мактау билгесе” һәм Халыклар дуслыгы орденнары, “Татарстан Республикасы каршындагы казанышлары өчен” ордены белән бүләкләнгән. Аңа “Татарстан Респуликасының атказанган төзүчесе” исеме бирелгән.

Илдар Халиков ассызыклаганча, Мөхәммәт Сабировның исеме мәңгегә безнең республика тарихына язылачак.


Минтимер Шәймиев билгеләгәнчә, ТРның беренче Премьер-министры өлешенә Татарстан Республикасы тарихының иң катлаулы чоры туры килде. “Гадәтләнгән тормыш рәвеше генә түгел, без үзебез дә үзгәрдек: фикер йөртүебез, дөньяга карашыбыз. Без ул вакытта күп нәрсәне беренче тапкыр эшләдек. Бу яңа сәяси аренада беренче адымнар иде. Мөхәммәт Галләм улы бернигә дә карамыйча үз эшен гадел һәм намуслы итеп башкарды”, - дип ассызыклады Минтимер Шәймиев.

Хушлашу чарасы тәмамланганда ТР мөфтие Камил хәзрәт Сәмигуллин җеназа намазын укыды.
Мөхәммәт Сабиров Арча кыры зиратына җирләнә.