Минтимер Шәймиев Геннадий Захаровны 80 яшьлек юбилее белән котлады

2015 елның 16 марты, дүшәмбе
Бүген Татарстан Республикасы Дәүләт Киңәшчесе Минтимер Шәймиев, 1988-2010 елларда РФ Саклык банкының “Татарстан банкы” идарәсе рәисе булып эшләгән Геннадий Захаровны 80 яшьлек юбилее белән котлады. Хәзерге вакытта ул Татарстан Республикасының Шахмат федерациясе президенты. Котлау тантанасы Россия Саклык банкының “Татарстан банкы” төп бинасының актлар залында узды.

Геннадий Захаровны котлап, Минтимер Шәймиев, юбиляр белән инде 53 ел таныш булулары, узган гасырның 60 елларында Минзәләдә бергә эшләүләре турында сөйләде. Ул шулай ук хәбәр иткәнчә, алар гомер буе шахмат уйнау буенча партнерлар, һәр якшәмбе көнендә шахмат уйнау өчен очрашалар.

“ Геннадий Захаров – ул шәхес, тумыштан талантлы, кешеләрне ярата. Ул – югары интеллектлы җитәкче. Үз гомерегезне безнең республика мәнфәгатьләренә хезмәт итүгә багышлаган өчен рәхмәт Сезгә. Татарстан Сезнең өчен икенче Ватаныгыз булды”, - дип белдерде Минтимер Шәймиев.
Ул юбилярны ТР Президенты Рөстәм Миңнеханов, ТР Дәүләт Советы рәисе Фәрит Мөхәммәтшин, ТР Премьер-министры Илдар Халиков исеменнән котлады һәм Геннадий Захаровка ТР Президентының Рәхмәтен тапшырды.

“Геннадий Николаевич – бик җаваплы кеше. Ул квартал саен безнең финанс күрсәткечләре отчетын анализлый. Бу Геннадий Николаевичның элеккечә безнең эшебез белән кызыксынуын күрсәтә, ул һаман безнең белән”, - дип белдерде үзенең котлау сүзендә Россия Саклык банкының Идел-Вятка идарәсе рәисе - РФ Саклык банкының “Татарстан банкы” бүлеге идарәчесе Рушан Сахбиев.
Ул Геннадий Захаровка, аның 80 яшьлек юбилеена бердәнбер нөсхәдә эшләнгән, юбилярның сыны төшерелгән көмеш монета бүләк итте.

ТР яшьләр эшләре һәм спорт министры урынбасары Хәлил Шәйхетдинов юбилярга министрлыкның югары бүләге – “Татарстан Республикасының физик культура һәм спорт отличнигы” дигән Мактау билгесен тапшырды.

Геннадий Захаровны шулай ук ТР Милли банкының элеккеге рәисе Евгений Богачев котлады.
ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International