Алексей Песошин: ТР Министрлар Кабинеты махсус янгынга каршы режим кертү турында карар кабул итте, ул эшләгән вакытта халык күп җыела торган объектларда тикшерүләр булачак

Бүген бишенче чакырылыш Татарстан Республикасы Дәүләт Советының алтынчы утырышында Татарстан Республикасы Премьер-министры урынбасары Алексей Песошин янгын куркынычсызлыгы таләпләрен бозган очраклары арту сәбәпле Россия законына берничә үзгәреш кертү турында тәкъдим ясады. Депутатлар бертавыштан аның тәкъдимен хупладылар.

Татарстан Хөкүмәтенең беренче урынбасары әле шушы көннәрдә генә күңелләрне тетрәндергән "Адмирал" сәүдә үзәгендә булган фаҗиганең нечкәлекләрен барлап узды. Алексей Песошин шәрехләп үткәнчә, янгын 22 мең кв. м мәйданда дөрләгән. Авария-коткару эшләренә барлыгы 1040 кеше, 177 берәмлек техника җәлеп ителгән. Янгын нәтиҗәсендә, 17 кешенең гомере өзелгән, 2 кеше әлегәчә хәбәрсез югалган булып исәпләнә. Фаҗигадә һәлак булганнарның гаиләләренә һәм каза күргәннәргә компенсацияләр түләү карары нигезендә, бүгенге көндә вафат булган затларның гаиләләренә барлыгы 4 млн сум, зыян күргәннәргә 7 млн сум акча түләнгән.

Һәлакәт нәтиҗәсендә китерелгән гомуми зыян 1 млрд 400 млн сум күләмендә бәяләнә. А. Песошин хәбәр иткәнчә, бүгенге көндә эшмәкәрләрнең 72 проценты яңа аренда килешүләре төзегән.

Беренче вице-премьер объектның 2013 нче елдан бирле экспертизасыз һәм рөхсәтсез эшләгәнен билгеләп үтте. 2013 нче елда анда янгын куркынычсызлыгы таләпләре бозылуның 14, ә 2014 нче елда 11 факты теркәлгән.

Алексей Песошин билгеләп узганча, 2007 нче елдан федераль закондагы үзгәрешләр белән бәйле рәвештә, Россиянең Гадәттән тыш хәлләр министрлыгы төзелеш һәм үзгәртеп кору объектларында янгынга каршы күзәтчелек белән шөгыльләнми. Бу янгын куркынычсызлыгы таләпләре бозылуга һәм җитди янгыннарга китергән. Ул халык күпләп җыела торган объектларда янгыннарның ешайганын ассызыклап узды.


Алексей Песошин 1994 нче елның 21 нче декабреннән "Янгын куркынычсызлыгы турында"гы 69 нчы федераль законга, 2008 нче елның 26 нчы декабреннән "Дәүләт һәм муниципаль контрольне (күзәтчелекне) гамәлгә ашырганда юридик затларның һәм шәхси эшмәкәрләрнең хокукларын яклау турында"гы 294 нче федераль законга, РФ Шәһәр төзезелеше кодексына һәм административ хокук бозулар турындагы кодекска үзгәрешләр кертү инициативасын хуплауны сорады.

Алексей Песошин сүзләренчә, ТР Министрлар Кабинеты ТРның аерым территорияләрендә махсус янгынга каршы режим кертү турында карар кабул итте. Бу режим вакытында халык күп җыела торган объектларда тикшерүләр булачак.