Казанга WorldSkills International (WSI) комиссиясе әгъзалары килде

Казанга WorldSkills International президенты Саймон Бартли җитәкчелегендә WorldSkills International (WSI) комиссиясе әгъзалары килде.

Кунакларны Казанның халыкара аэропортында Татарстан Республикасы Премьер-министры Илдар Халиков, ТР Премьер-министры урынбасары – ТР мәгариф һәм фән министры Энгель Фәттахов, Казан мэры Илсур Метшин, “Спорт проектлары башкарма дирекциясе” автоном коммерциячел булмаган оешманың генераль директоры Азат Кадыров каршы алды.

2015 елның 25 мартында WSI комиссиясе әгъзалары WorldSkillsArena күргәзмә үзәгенә (ТР ның Лаеш районы) нигез салуның рәсми тантанасында катнаша. Көннең икенче яртысында Казан Ратушасында 2019 елгы WorldSkillsCompetition һөнәри осталык буенча дөнья чемпионатын уздыру хокукына кандидат-шәһәр Казанның заявкасын презентацияләү була.

Искә төшерәбез, Россия WorldSkillsCompetition һөнәри осталык буенча халыкара ярышлар уздыру хокукына заявканы 2015 елның гыйнварында бирде. Откан очракта ярышлар Казанда узачак ( 2019 елда ярышлар уздыру хокукына шулай ук Бельгиянең Шарлеруа һәм Франциянең Париж шәһәрләре дәгъва белдерә).

Белешмә өчен:
WorldSkills – халыкара коммерциячел булмаган хәрәкәт, аңа 1950 елда нигез салынган, максаты – эшче һөнәрләренең абруен күтәрү һәм һөнәри белемне үстерү. Хәзерге вакытта ул 72 илне берләштерә, Россия аңа 2012елның маенда кушылды.