Яшел Үзәннең А.М.Горький исемендәге заводында "Грайворон" кече ракета корабын төзи башладылар

Бүген Яшел Үзәннең А.М.Горький исемендәге заводында тантаналы төстә 21631нче проектның кече ракета корабы сериясендә тугызынчы корпусы төзелә башлады һәм секция-җыю цехында яңа җиһазларны файдалануга тапшырылды.

Чарада ТР Премьер-министры Илдар Халиков, РФ оборона министры урынбасары Юрий Борисов, РФ Хәрби-диңгез флоты баш командующие адмирал Виктор Чирков, Белгород өлкәсенең Грайворон районы хакимияте башлыгы Александр Верзун, ТР Яшел Үзән районы башлыгы, Яшел Үзән мэры Александр Тыгин, "Ак Барс" холдинг компаниясе" ААҖ директоры Иван Егоров, "Яшел Үзәннең А.М.Горький исемендәге заводы" генераль директоры Ренат Мистахов һәм башкалар катнашты.

Сәламләү сүзендә Илдар Халиков билгеләп узганча, яңа кораб җитештерә башлау - завод өчен генә түгел, бөтен республика өчен бәйрәм. Татарстан Президенты вазифаларын вакытлыча башкаручы Рөстәм Миңнеханов һәм ТР Хөкүмәте исеменнән РФ Оборона министрлыгына заводка күрсәтелгән ышаныч һәм яңа заказлар алу мөмкинлеге өчен рәхмәт белдерде.

"Бу вакыйга ТРның беренче Президенты Минтимер Шәймиевның "Без булдырабыз!" дигән сүзен тагын бер кат раслый, - диде ТР Премьер-министры. - Иң югары технологияле судно төзү предприятиесе, Горький исемендәге заводның уңышлы эше дәвам итүен телим. РФ Президенты куйган һәм ил бездән үтәлүен көткән бурычларны лаеклы рәвештә үтәрбез дип ышанам".

Кече ракета корабларын төзү турындагы карар Каспий флотының судно төзелешен үстерү программасы кысаларында кабул ителгән. 2010 елда Яшел Үзән заводы тендерда откан һәм Россия Оборона министрлыгы белән әлеге проект корбаларын төзүгә контрактны имзалаган.

Ренат Мистахов искәртеп узганча, беренче шундый "Град Свияжск" корабы 2010 елда төзелә башлаган. Тугызынчы корабка РФ Хәрби-диңгез флоты баш командующие боерыгы белән "Грайворон" атамасы бирелгән.


"Яңа технологияләр үзләштерү - булачак продукция сыйфаты нигезе, шуңа да без сезгә заказ бирәбез. Ә сезнең өчен бу хезмәт җитештерүчәнлеген һәм продукциянең көндәшлеккә сәләтлелеген арттыру, - диде Юрий Борисов. - Бу корабларга Каспийда ихтыяҗ зур һәм Кара диңгездә дә ихтыяҗ булачак".

Үз чиратында, Александр Верзун корабның Җиңүнең 70 еллыгы алдыннан төзелә башлавын билгеләп үтте. "Бүгенге вакыйга һәм бу корабка безнең шәһәр исемен бирү - бу Бөек Ватан сугышында һәлак булган грайворонлыларга, ветераннарга, бүгенге көндә безгә кораб төзи башлау мөмкинлеген тәэмин иткән барча кешеләргә хөрмәт билгесе", - дип белдерде ул.

Традиция буенча төзелүче кораб нигезенә истәлек билгесен салу чарасы булды. Заводның их яхшы хезмәткәрләре "Фидакарь хезмәт өчен" медальләре белән бүләкләнде, ТР Министрлар Кабинеты Рәхмәт хатларын һәм РФ Хәрби-диңгез флоты баш командующие грамоталарын алды.