Илдар Халиков: Татарстан “Мәскәү-Казан” югары тизлекле тимер юл магистрале проектының Пекинга кадәр озайтылачагын тулысынча хуплый

Татарстан Республикасы “Мәскәү-Казан” югары тизлекле тимер юл магистрале проектының Пекинга кадәр озайтылачагын тулысынча хуплый. Бу хакта бүген Татарстан Республикасы Премьер-министры Илдар Халиков Россия-Кытай эшлекле төркеменең югары тизлекле тимер юл магистрале проектын гамәлгә ашыру өлкәсендә хезмәттәшлек буенча бишенче утырышында һәм Россия-Кытай эшлекле төркеменең өченче утырышында белдерде.

Бу чара Казанда, “Корстон” сәүдә-күңел ачу комплексында узды. Анда шулай ук “Россия тимер юллары” ("РЖД”) ААҖ нең беренче вице-президенты Александр Мишарин, Кытай Халык Респубдикасы вәкилләре катнашты.

Илдар Халиков, Татарстан Президенты һәм Татарстан Хөкүмәте исеменнән бу чараны уздыру өчен Татарстан Республикасы сайланганы өчен катнашучыларга рәхмәт белдерде.

Кытай Халык Республикасы белән хезмәттәшлек итү – Татарстан өчен яхшы традиция, республикада Кытай партнерлары катнашында күп чаралар һәм проектлар гамәлгә ашырыла, - дип ассызыклады Илдар Халиков.

“Халыкара тәҗрибәдән күренгәнчә, югары тизлекле тимер юл магистральләре төзелеше иктисад үсеше өчен этәргеч булып тора. Россия Федерациясе җитәкчелеге һәм шәхсән Россия Президенты Владимир Путинның бу проектны хуплавы безнең аеруча әһәмиятле”, - диде Илдар Халиков.

ТР Премьер-министры шулай ук республиканың “Мәскәү-Казан” югары тизлекле тимер юл магистрале проектының Пекинга кадәр озайтылачагын тулысынча хуплавын ассызыклады.

“Моннантыш, магистраль төзелеше күп төзелеш коипанияләрен, төзелеш эшләнмәләре җитештерүчеләрне эш белән тәэмин итәргә мөмкинлек бирәчәк, һәм Татарстан сәнәгате проектны гамәлгә ашыруның тизрәк башлануын көтә”, - дип белдердеИлдар Халиков.