Татарстан Республикасы Премьер-министры Рөстәм Миңнеханов Татарстан Республикасы Инвестицион-венчур фонды Попечительләр советы утырышын үткәрде

Бүген Татарстан Республикасы Премьер-министры – фондның Попечительләр советы рәисе Рөстәм Миңнеханов Татарстан Республикасы Инвестицион-венчур фондының Попечительләр советы утырышын үткәрде.
Төп доклад белән “Татарстан Республикасы Инвестицион-венчур фонды” (ТР ИВФ) дәүләт коммерцияле булмаган оешмасының генераль директоры Айнур Әйделдинов чыгыш ясады.
Ул, аерып алганда, ТР ИВФ портфеленең бүгенге көндә 113 инновацион проектны үз эченә алуы турында хәбәр итте. Аларның яртысы рәсмиләштерелгән интеллектуаль милек стадиясенә җиткерелгән, 25 % - сынау-гамәлгә кертү, 25 % - фәнни-эзләнү, сынау һәм конструктор эшләре стадиясендә. Гомумән, фондның биш еллык эшчәнлеге дәвамында раслауга әзерләнүнең төрле дәрәҗәсендә булган 4 меңнән артык проект тапшырылды.
Айнур Әйделдинов сүзләренә караганда, үз эшләрен камилләштерү өчен фонд белгечләре алдынгы халыкара үзәкләрнең венчурлы финанслау һәм туры инвестицияләр өлкәсендәге тәҗрибәләрен өйрәнәләр. Шулай итеп, ТР ИВФ генераль директоры АКШ һәм Европа структуралары белән партнерлык мөнәсәбәтләре урнаштыруы турында сөйләде. Аерым алганда, бүген Мериленд университеты (АКШ) нигезендә фонд вәкиллеген төзү турында фикер алышу бара.
“Татарстан Республикасы өчен 50 иң яхшы инновацион идея” республика конкурсы һәм “Идея-1000” инновацион проектлар конкурсына килгәндә, гомумән, 2009 елда аларда катнашу өчен 1273 гариза кабул ителгән. Проектлар экспертизасы берничә этапта узды. Нәтиҗәдә, 132 җиңүче сайланды (номинацияләрдәге проектлар, конкурс партнерлары белән сайланып алынган проектлар һ.б.).
Попечительләр советы әгъзалары ТР ИВФның 2009 елгы эшчәнлеген хупладылар.
Соңыннан Россия туры инвестицияләр һәм венчурлы капитал индустриясе үсеше турында докладлар белән ТР ИВФ Попечительләр советы әгъзалары каршында Россия венчур ярминкәсе директоры Игорь Гладких, “Россия венчур компаниясе” (РВК) генераль директоры Игорь Агамирзян, Кече форма предприятиеләр үсешенә ярдәм итү фондының генераль директоры Сергей Поляков чыгыш ясадылар.
Утырышның нәтиҗәләрен ясап, Татарстан Республикасы Премьер-министры Рөстәм Миңнеханов түбәндәгене хәбәр итте: Татарстанның башка Россия төбәкләре арасында инновацион эшчәнлек үсеше һәм венчур проектларны тормышка ашыру өчен аз эшләмәвенә карамастан, башка илләр белән чагыштырганда, аның алга таба үсү мөмкинлеге бар. Мисал итеп ул инновацион сфера үсеше, технопарклар челтәре тәзелү, Кытайдагы индустриаль мәйданчыкларны китерде.
Моннан тыш, бүген югары уку йортлары эшчәнлеге инновацияләр өлкәсендә күпкә нәтиҗәлерәк булсын өчен, аларның ментальлеген үзгәртергә кирәк, дип саный Рөстәм Миңнеханов. “Безгә чит ил лицензияләрен сатып алырга түгел, үз фәнебезне үстерергә кирәк, - дип әйтте Рөстәм Миңнеханов. – Моның өчен безнең интелектуаль потенциал җитәрлек дәрәҗәдә”.
Утырыш бетүгә, ТР ИВФ Попечительләр советы әгъзалары һәм кунаклар “Татарстан Республикасы өчен 50 иң яхшы инновацион идея” конкурсы һәм “Идея-1000” инновацион проектлар конкурсы җиңүчеләрен тантаналы бүләкләүдә (“Пирамида” мәдәни күңел ачу комплексы) катнаштылар.