Татарстан Республикасы Президенты вазыйфаларын вакытлыча башкаручы Р.Н. Миңнехановның рус халык бәйрәме Каравон уңаеннан МӨРӘҖӘГАТЕ

Хөрмәтле татарстанлылар!
Сезне үзенчәлекле рус фольклор бәйрәме – Каравон белән тәбрик итәм!
Рус милләте күп гасырлар буена җыйган зур рухи көчкә һәм бетмәс-төкәнмәс иҗади кодрәткә ия булган әлеге бәйрәм күпмилләтле Татарстан мәдәниятенә кабатланмас төсмер бирә.
Аның башлангычы булып Лаеш районының Рус Никольское авылында бар яшьтәге төрле милләт һәм дин вәкилләрен җыючы җырлы әйлән-бәйлән тора. Әлеге матур йола җәмгыятебезнең дус-тату булып яшәвенә хезмәт итә.
Башка милли бәйрәмнәр кебек Каравон көчен Җир-анадан ала. Ул чәчү тәмамлануга, яз һәм уңышка багышланган тантана. Шуңа күрә әлеге бәйрәм һәркем өчен аңлаешлы һәм якын. Халык җырлары, биюләре һәм уеннары кешеләрне якынайта, яхшылыкка һәм матурлыкка өнди.
Елдан-ел «кояш тирәли» җитәкләшеп биеп әйләнергә теләүчеләрнең саны арта бара, әйлән-бәйлән халык иҗатының яңа якларын ача.
Рәсәй Федерациясендә игълан ителгән Әдәбият елында рус теленә, борынгы җыр сәнгатенә, гореф-гадәтләргә һәм йолаларга хөрмәт хисе тудыручы Каравонны бәйрәм итү аеруча яңгыраш ала.
Әлеге кояшлы бәйрәм йөрәкләребезгә тынычлык һәм изгелек өстәсен, аралашуыбызны җылы һәм күңелле итсен.
Каравонда катнашучыларга һәм кунакларга яхшы кәеф, нык исәнлек, бәхет, иминлек һәм муллык телим!
Татарстан Республикасы Президенты вазыйфаларын вакытлыча башкаручы Р.Н. Миңнеханов