Минтимер Шәймиев: “Болгарны Бөтендөнья мирас исемлегенә кертеп, бер ел узгач без сайлаган юлыбызның дөреслегенә тагын да ышандык”

Бүген борынгы шәһәр Болгарны ЮНЕСКОның Бөтендөнья мирас исемлегенә кертүгә бер ел тулды. 2014 елның 23 июнендә Доха шәһәрендә (Катар дәүләте) ЮНЕСКО Бөтендөнья мирас комитетының 38 нче сессиясе карары белән Болгар тарих-археология комплексы Бөтендөнья мирас исемлегенә кертелде.

Болгар Бөтендөнья мирас исемлегенә кертелгән объектларның дөньяда 1002 нчесе, Татарстанда 2 нчесе (Казан Кремле бу исемлеккә 2000 елда кертелде).

“Без әле һаман да узган елның июнь аенда булган тарихи вакыйга- Болгар тарих-археология комплексын ЮНЕСКОның Бөтендөнья мирас исемлегенә кертелүен аңлау процессында. 2013 елның июнендә Пномпень шәһәрендә (Камбоджа) узган сессиядә Комитет Болгарның Бөтендөнья универсаль хәзинә булуын таныды. 2014 елның июнендә Болгар Бөтендөнья мирас исемлегенә кертелде. Мин һәркайда һәм һәрвакыт әйтүемчә, бу җиңү иде. Бу эш белән шөгыльләнгән аерым команданың гына җиңүе түгел, ә бәлки бөтен республиканың, безнең күп милләтле халкыбызның җиңүе иде.

Тарихны сайлап алмыйлар. Безнең халыкның тарихы гади түгел. Болгарларның һәм безнең халыкларның тарихы турында ЮНЕСКО исемлегенә материаллар әзерләгәндә, безгә фәнни дөньяда булган мәгълүматларның барысын да өйрәнергә туры килде, шул сәбәпле безнең татар һәм болгарларның тарихы буенча фундаменталь хезмәтләребез бар. Без үзебезнең борынгы ядкәрләребезне ЮНЕСКО-ИКОМОС, ИКРОМ кебек дөньяда танылган оешмаларның үз эшләрен белүче экспертларына күрсәттек. Экспертлар безнең тарихыбызны өйрәнеп һәм объектив бәяләп, Болгарны ЮНЕСКО исемлегенә керттеләр. Димәк, халкыбыз тарихы объектив рәвештә яңадан торгызылды, танылды һәм бөтен дөньяга тәкъдим ителде. Бу – узган ел булган тарихи вакыйганың төп әһәмияте.

Болгарны Бөтендөнья мирас исемлегенә кертеп, бер ел узгач без сайлаган юлыбызның дөреслегенә тагын да ышандык. Безнең бик яхшы команда барлыкка килде, аларның эшләү дәрәҗәсе ЮНЕСКОның югары таләпләренә туры килә. Без Россиянең башка төбәкләренә дә тарихи мирасны яңадан торгызу эшендә ярдәм итә алабыз”, - дип белдерде Минтимер Шәймиев бүгенге тарихи вакыйганы шәрехләп.