Татарстан Республикасы Премьер-министры Рөстәм Миңнеханов Кытайның Экспорт-Импорт банкына берничә инвестиция проектын тәкъдир итте

Кытайның Экспорт-Импорт банкы (The Export-Import Bank of China) Татарстан Республикасы Премьер-министры Рөстәм Миңнехановның Давоста әлеге банк җитәкчелегенә бүген тәкъдир иткән берничә инвестиция проекты белән кызыксынып китәргә мөмкин.
Исегезгә төшерәбез: эш сәфәре белән хәзерге вакытта Давоста (Швейцария) булып, бүген иртән Татарстан Республикасы Премьер-министры Рөстәм Миңнеханов Кытайның Экспорт-Импорт банкы рәисе Ли Руогу әфәнде белән очрашты. Очрашу барышында сүз Татарстаннның икътисади потенциалы, кайбер тармакларының алдагы үсеше турында барды. Ли Руогу әфәнде берничә проектны алга таба өйрәнүдә кызыксынуын белдерде. Соңыннан Татарстан Хөкүмәте башлыгы “Даймлер АГ” (Daimler AG) концернының директорлар советы әгъзасы, Daimler Trucks юнәлеше җитәкчесе Андреас Реншлер белән очрашу үткәрде. Сөйләшүләрдә “КамАЗ” ААҖ генераль директоры Сергей Когогин катнашты. Сүз Россиянең зур йөк ташу машиналары җитештерүченең “Даймлер АГ” концерны белән алга таба хезмәттәшлек итүе турында барды.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов хәбәр иткәнчә, бүген үк Татарстан Премьер-министры Рөстәм Миңнехановның Barclays Capital банкы (Великобритания) топ-менеджеры белән эшлекле төшке ашы булды. Әлеге очрашуда “Татнефть” ААҖ генераль директоры Шәфәгать Тәхәветдинов катнашты. Эшлекле төшке ашта катнашучылар нефть һәм нефть химиясе проектларында мөмкин булган хезмәттәшлек итү темалары турында фикер алыштылар.
Моннан тыш, бүген Татарстан Республикасы Премьер-министры “Россия” телеканалына да интервью бирде. Анда ул региональ үсеш мәсьәләләре, заманча базар шартларында региональ икътисад перспективалары турындагы сорауларга җавап бирде.
Көннең икенче яртысында Рөстәм Миңнеханов һәм Татарстан делегациясенең башка әгъзалары Давостагы Бөтенденья икътисади форумның пленар утырышларында (27-31 нче гыйнвар көннәрендә) катнашачаклар. Пленар утырышлар үсеп килә торган илләр үсешен күзәтүгә (The New Growth Narrative) һәм глобаль идарә итү мәсьәләләренә (Global Governance Redesigned) багышланган.