Казанда Спортның су төрләре буенча дөнья чемпионатында катнашучыларны йөртү өчен 136 маршрут билгеләнгән

Казанда 2015 елгы Спортның су төрләре буенча дөнья чемпионатында катнашучыларны йөртү өчен 136 маршрут билгеләнгән. Бу хакта бүген Казанда 2015 елгы Спортның су төрләре буенча дөнья чемпионаты вакытында транспорт белән тәэмин итү мәсьәләләренә багышланган брифингта “Спорт проектлары башкарма дирекциясе” коммерцияле булмаган автоном оешма генераль директоры урынбасары Азат Галиәхмәтов хәбәр итте. Брифинг ТР Хөкүмәте йортында республиканың барлык муниципаль районнары белән видеоконференцэлемтә режимында узды.

Азат Галиәхмәтов сүзләренчә, чемпионат кунаклары килү урыннарында эшләү өчен профессиональ транспорт командасы тупланган. Барлыгы 79 кеше җәлеп ителә, шул исәптән 51 кеше Мәскәү аэропортларында эшләү өчен җибәрелгән.
Транспорт хезмәте күрсәтү эше 17 июльдән 18 августка кадәр оештырылачак.

Чемпионатның беренче кунаклары "Казан" халыкара аэрпортына 17 июль көнне килеп төшә, бу АКШ һәм Канада җыелма командалары. Шул көннән калган кунаклар килә башлый. 21, 22 һәм 29 июль көннәре чемпионатта катнашучылар иң күп киләчәк көннәр булачак. Бу көннәрдә Казан көн саен 500дән артык кунаклар кабул итәчәк. 10 август - иң күп китүчеләр көне. Бу көнне Татарстан башкаласыннан 1,5 мең катнашучы китәчәк, дип өстәде Азат Галиәхмәтов.

Ул хәбәр иткәнчә, Казан буйлап клиентлар төркемен 132 туристлар автобусы һәм 45 микроавтобус йөртәчәк. Шулай ук “АвтоВАЗ” партнер-компаниясе 183 җиңел машина белән тәэмин итә. Транспорт белән йөртүнең алты системасы формалаштырылган: спортчылар, ФИНА даирәләре, ММЧ вәкилләре һәм башкалар. Кунаклар утырган транспорт чаралары хәрәкәт итәчәк 136 маршрут билгеләнгән. Күчмә состав шәһәр җәмәгать транспорты юлыннан йөрү хокукыннан файдаланачак.

Шулай ук спорт бәйрәмендә 2,5 мең волонтер катнашачак. Волонтерларга транспорт карталары бирелә, ярышларга билетлары булган тамашачылар җәмәгать транспортында бушлай йөри алачак.

Моннан тыш, оештыру комитеты тарафыннан тамашачылар өчен спорт объектларыннан (“Казан-Арена” стадионы, Спортның су төрләре сарае, Суда туплы уен аренасы) "Кәҗә бистәсе" метросына кадәр 24 июльдән башлап көн саен 22.00дән төнге сәгать 1гә кадәр өстәмә бушлай маршрутлар кертү турында карар кабул ителде.