Казанда 2015 елгы Спортның су төрләре буенча дөнья чемпионатына 190 илдән 2651 спортчы киләчәк

Казанда 2015 елгы Спортның су төрләре буенча ДЧна 190 илдән 2651 спортчы киләчәк. Бу хакта бүгенТатарстан Премьер-министры Илдар Халиков Казанда Спортның су төрләре буенча 16 нчы Дөнья чемпионатына һәм “Мастерс” категориясендә Дөнья чемпионатына әзерлек һәм бу чараларны уздыру буенча оештыру комитеты утырышында хәбәр итте.

Спорт ярышларына, чемпионатны ачылу һәм ябылу тантаналарына, “Пилигрим” шоусына барлыгы 450 мең билет сатуга куелган иде. Бүгенге көндә 160 меңнән артык билет сатылган.
Кассалар Казан метрополитенында, “Корстон” комплексында, "Казан" агросәнәгать паркында, Россия почтасы бүлекләрендә, “Таттелеком” бүлекләрендә, “Казан-Арена” стадионында бар. Моннан тыщ, билетларны www.ticketkazan2015.com, www.kazan2015.com сайтларында сатып алырга мөмкин.

Утырышта хәбәр ителгәнчә, чемпионатта катнашу өчен Казанга Россиянең 20 төбәгеннән, шулай ук дөньяның 10 иленнән 516 волонтер килгән.

Бөтен дөнья буенча телевизион тамашачылар 4,5 млрд. тәшкил итәчәк дип көтелә. Чемпионатның ачылыш һәм ябылу тантаналары гына түгел, ә бәлки ярышлар да трансляцияләнәчәк.

Чемпионатның төп чаралары булган спорт вакыйгалары: 18 июль – рәсми булмаган күнегүләр башлана, 19 июль- суга сикерү буенча рәсми күнегүләр башлана, 20 июль – синхрон йөзү һәм ачык суда йөзү буенча рәсми күнегүләр, 23 июль – суда туплы уен буенча рәсми күнегүләр, 24 июль – 2015 елгы спортның су төрләре буенча чемпионатның башлануы, 28 июль – йөзү буенча рәсми күнегүләр, 31 июль – хай-дайвинг буенча рәсми күнегүләр.
“Мастерс” категориясендәге спортның су төрләре буенча дөнья чемпионатына 5 августтан 16 августка кадәр 74 илдән 2790 спортчы киләчәк.