Илдар Халиков Австралиянең Россия Федерациясендәге Гадәттән тыш һәм Тулы вәкаләтле илчесе Пол Майлер белән очрашты

Татарстан Премьер-министры Илдар Халиков бүген Австралиянең Россия Федерациясендәге Гадәттән тыш һәм Тулы вәкаләтле илчесе Пол Майлер белән очрашты.
Очрашу ТР Хөкүмәте йортында узды.

Безнең спорт һәм мәдәният өлкәсендәге хезмәттәшлек икътисадка да күчәргә тиеш, диде Илдар Халиков, кунакларны сәламләп, Австралия һәм Татарстан Республикасы арасындагы мөнәсәбәтләрне җайлау һәм ныгытуга ярдәм итәчәк уртаклыкны табарга кирәк.

ТР Премьер-министры кыскача төбәк икътисадының төп үсеш юнәлешләре, инновацион мәйданчыклар һәм Татарстан Республикасында урнашкан махсус икътисадый зоналарның мөмкинлекләре турында сөйләде. Бүген “Алабуга” МИЗы актив үсештә, аның 42 резиденты бар, 5 меңнән артык эш урыны булдырылган. Якын арада “Алабуга” МИЗы территориясе зурайтылачак, чөнки инвесторлар ягыннан җитди ихтыяҗ бар, дип билгеләде ул. “Алабуга” МИЗы Австралия эшмәкәрләре өчен Россия базарына чыгарга яхшы мәйданчык булырга мөмкин, дип белдерде Илдар Халиков.

ТР Хөкүмәте башлыгы шулай ук “Мастер” Кама индустриаль паркы турында да сөйләде. Ул хәбәр иткәнчә, бүгенге көндә ул Европада иң зур индустриаль парк, мәйданы 640 мең кв. метр тәшкил итә.

Илдар Халиков сүзләренчә, инвесторлар өчен Казаннан 30 км ераклыктагы Иннополис инновацион шәһәре дә кызыклы булачак, анда “Иннополис” МИЗы һәм Американың Карнеги Мелон университеты (Carnegie Mellon University - CMU) белән бергә нигезләнгән ИТ-университет урнашкан.

Илдар Халиков хәбәр иткәнчә, бүген республикада мәгълүмати технологияләрне үстерүгә аерым игътибар бирелә, ул Казанда югары технологияләр өлкәсендәге технопарк - IТ-паркны карарга тәкъдим итте. Республикада документ әйләнешенең 95 проценты электрон рәвешкә күчерелгән, гомуми белем бирү мәктәпләренең 100 проценты югары тизлекле интернетка
тоташтырылган, ул шулай ук халыкка электрон рәвештә күрсәтелә торган дәүләт хезмәтләренең күләмле булуы турында сөйләде.

Үз чиратында, Австралиянең Россия Федерациясендәге Гадәттән тыш һәм Тулы вәкаләтле илчесе Пол Майлер җылы кабул итүләре өчен рәхмәт белдерде.

Алга таба ике яктан да катнашучылар хәзерге икътисадый шартларда икътисадның кайбер тармакларында хезмәттәшлекне ныгыту мәсьәләләре буенча фикер алыштылар.

Аерым алганда, Татарстан Премьер-министры бизнес алып бару шартлары белән җентекләп танышу өчен, республикага Австралия эшмәкәрләренең бизнес-визитын оештыруны тәкъдим итте.