Илдар Халиков Казанда Спортның су төрләре буенча дөнья чемпионатында эшләгән иң яхшы полицейскийларны бүләкләде

ТР Премьер-министры Илдар Халиков бүген Казанда Спортның су төрләре буенча 16нчы дөнья чемпионаты һәм "Мастерс" категориясендә спортның су төрләре буенча дөнья чемпионатына әзерлек һәм аны уздыру вакытында тәртип саклаган Россия Эчке эшләр министрлыгының үзәк аппараты эшче төркеме вәкилләренә, ТР һәм РФ субъектлары эчке эшләр органнары отрядлары командирларына Татарстан Республикасының Дәүләт бүләкләрен тапшырды.

Бу тантана ТР буенча Эчке эшләр министрлыгының мемориаль-гыйбадәт кылу комплексы мәйданчыгында узды. Анда шулай ук ТР буенча эчке эшләр министры Артем Хохорин, Россия Эчке эшләр министрлыгы үзәк аппаратының эшче төркем җитәкчесе Антон Гусев катнашты.

Үзенең сәламләү сүзендә Илдар Халиков ТР буенча Эчке эшләр министрлыгының барлык хезмәткәрләре, шулай ук Россиянең башка төбәкләреннән килеп, Татарстандагы коллегаларына үзләренең ярдәмнәрен күрсәткән хокук саклау органнары вәкилләренә рәхмәт белдерде.

"Бу чараның зур яңгыраш табуы һәм ММЧда күп яктыртылуын аерым билгеләргә кирәк. АКШ, Кытай, Европа һәм Азия кебек илләрнең барлык зур басмалары үзләренең туры эфирларында Казаннан яңалыклар тапшырды. Хәтта шундый зур һәм еш кына Россиягә начар мөнәсәбәттә булган “Нью-Йорк Таймс”кебек басма да Казандагы дөнья чемпионатының әзерлеге, оештырылуы һәм иминлеге тәэмин ителешенең югары дәрәҗәдә булуын билгеләде”, - дип ассызыклады ТР Премьер-министры.

Илдар Халиков шулай ук Россия Эчке эшләр министрлыгының Казан юридик институты һәм РФ Эчке эшләр министрлыгының эчке гаскәрләр хезмәткәрләренә рәхмәт белдерде.

Алга таба бүләкләү тантанасы булды. Россия Эчке эшләр министрлыгы үзәк аппаратының эшче төркем җитәкчесе Антон Гусевка Татарстан Республикасының "Фидакарь хезмәт өчен" медале тапшырылды.
ТР Министрлар кабинетының "Хокук тәртибен ныгытудагы казанышлары өчен" күкрәк билгесен ТР Премьер-министры кулыннан РФ Эчке эшләр министрлыгы Эчке гаскәрләре төбәк командованиесенең 6676 нчы гаскәр часте командиры Юрий Баев алды.
Калган хезмәткәрләргә ТР буенча эчке эшләр министры Рәхмәте һәм ТР буенча Эчке эшләр министрлыгы Мактау грамоталары бирелде.