Илдар Халиков Кытай делегациясе вәкилләре белән туристлык өлкәсендә хезмәттәшлекне үстерү перспективалары хакында фикер алышты

Бүген ТР Хөкүмәте йортында Татарстан Республикасы Премьер-министры Илдар Халиков Кытай Халык Республикасының Туристлык буенча Дәүләт идарәсе делегациясе белән очрашты. Очрашуда Туристлык буенча ТР Дәүләт комитеты рәисе Сергей Иванов, ТР МК аппаратының Сәламәтлек, спорт һәм сәламәт яшәү рәвешен формалаштыру идарәсе башлыгы Гүзәл Шакирова катнашты.

Илдар Халиков билгеләгәнчә, Татарстанның туристлык өлкәсендәге җәлеп итүчәнлеге көннән-көн үсә бара. “Бездә бу өлкә өчен җаваплы аерым дәүләт органы формалашкан. Кытай, үз чиратында, Россия өчен дә, шулай ук Татарстан өчен дә, туристлык өлкәсендә өстенлекле партнер булып тора”,- дип ассызыклады ул.

Илдар Халиков статистик мәгълүматлар китерде, Россиягә килгән туристларның һәр алтынчысы Кытай гражданы. Ул шулай ук ТР даими рәвештә Пекин һәм Шанхайда узган туристлык күргәзмәләрендә катнаша, дип билгеләде.

Туристлык агымын арттыру өчен Казаннан Кытай провинцияләренең берсенә туры авиарейс оештыру да яхшы булачак, дип саный Илдар Халиков.

Кытай делегациясе башлыгы Вэй Хуньтао җылы кабул итүләре өчен Илдар Халиковка рәхмәт белдерде. Ул искә төшергәнчә, бүген Казанда гуманитар хезмәттәшлек буенча Россия-Кытай комиссиясе утырышы узды, аның төп темасы туристлык өлкәсендә хезмәттәшлекне үстерү иде.
Утырышта катнашучылар туристлык һәм инвестицион мөмкинлекләрне арттыру, шулай ук Россия һәм Кытайның эшмәкәрлек һәм туристлык индустриясе вәкилләре арасында эшлекле элемтәләрне ныгыту турында фикер алыштылар.