Федераль экологик, технологик һәм атом күзәтчелеге хезмәте һәм Татарстанның Министрлар Кабинеты арасында хезмәттәшлек итү турында килешүгә кул куелды

Татарстанга Федераль экологик, технологик һәм атом күзәтчелеге хезмәте Идел буе идарәсенең җитди, системалы эш алып баруы кирәк.
Бүген бу турыда Федераль экологик, технологик һәм атом күзәтчелеге хезмәте (Ростехнадзор) Идел буе идарәсе контролендәге предприятие һәм оешмаларның сәнәгать, энергетика һәм экология куркынычсызлыгы торышына багышланган киңәйтелгән утырышта Рөстәм Миңнеханов белдерде.
Киңәшмә видеоконференцэлемтә режимында алып барылды, анда Ростехнадзор идарәсенең 2009 елгы эшенә нәтиҗәләр ясалды һәм агымдагы елга бурычлар куелды.
Киңәшмәдә Федераль экологик, технологик һәм атом күзәтчелеге хезмәте җитәкчесе Николай Кутьин катнашты.
Төп доклад белән Ростехнадзорның Идел буе идарәсе башлыгы Борис Петров чыгыш ясады.
Татарстан Республикасы Премьер-министры Рөстәм Миңнеханов республика территориясендә эре нефть чыгару, нефть эшкәртү предприятиеләре урнашуын, торбаүткәргечләр узуын искә төшерде, һәм Татарстанга технологик куркынычсызлыкны тәэмин итү, әйләнә-тирә мохиткә технологик йөкләнешне киметү мәсьәләләре буенча аермачык системалы эш алып бару кирәген белдерде.
Сезнең хезмәт гамәлләре инерцион, дип билгеләп үтте Рөстәм Миңнеханов, һәм бу хәлне бер ел эчендә генә төзәтү мөмкин түгел, эш планлы рәвештә алып барылырга тиеш.
Татарстан Республикасы Хөкүмәте башлыгы сүзләренә караганда, бүген эре сәнәгать предприятиеләре әйләнә-тирә мохиткә булган техноген йөкләнешне киметү өчен үзләре булдыра алган бар әйберләрне дә эшиләр. Моннан тыш, предприятиеләрдә персоналны укытуга да аеруча зур игътибар бирелә – аеруча экстремаль ситуацияләрдә.
“Сәнәгать предприятиеләре һәм Ростехнадзор арасында яхшы элемтәләр булдырылган, - диде Рөстәм Миңнеханов. – Һәм шундый җайга салынган, бердәм эш яхшы нәтиҗәләр бирә”.