Казанда Finnopolis - 2015 инновацион финанс технологияләренең беренче форумы ачылды

Бүген Казанда Finnopolis - 2015 инновацион финанс технологияләренең беренче Казан форумы ачылды. Аның эшендә Россия Үзәк банкы рәисе Эльвира Нәбиуллина, РФ элемтә һәм гаммәви коммуникацияләр министры Николай Никифоров, ТР Премьер-министры Илдар Халиков, "Россия Саклык банкы"/"Сбербанк России" ААҖ идарә рәисе Герман Греф катнаша.

Форумны Россия Банкы һәм Татарстан Республикасы Хөкүмәте оештырган. Форумның максаты - Россия Федерациясенең финанс секторында яңа буын мәгълүмати технологияләрне гамәлгә кертү.

Илдар Халиков форумда катнашучыларны Татарстан Президенты вазифаларын вакытлыча башкаручы Рөстәм Миңнеханов исеменнән сәламләде. Ул Эльвира Нәбиуллинага бу чараны уздыру өчен Казанны сайлаулары өчен рәхмәт белдерде, шулай ук форумның нәтиҗәле эшләвен теләде.

Пленар утырышка кадәр рәсми затлар финанс базары дигитализациясенә багышланган стартаплар тәкъдим ителгән күргәзмәне карап чыкты.
Ике көн эшләячәк форумда хакимият һәм бизнесның финанс секторында мәгълүмати технологияләрне гамәлгә кертү перспектиаларына карашы, мәгълүти технологияләрне үстерү өлкәсендә дөньякүләм трендлар, Россия Банкының перспективалы түләү системасы дизайны һәм сервислары, клиентларның кредит һәм башка рискларына бәя бирү максатында финанс секторы предприятиеләре өчен Хөкүмәт мәгълүматларының on-line ачыклыгын тәэмин итү кебек темалар күтәреләчәк.