Илдар Халиков Екатеринбургта узган VI Россия-Әзәрбайҗан төбәкара форумында катнашты

Екатеринбургта VI Россия-Әзәрбайҗан төбәкара форумы узды. Чараның төп темасы ике илнең сәнәгый, фәнни-техник, сәяси һәм башка өлкәләрдә хезмәттәшлек перспективалары турында булды. Анда Россиянең 11 төбәге һәм Әзәрбайҗанның 5 өлкәсеннән 200дән артык кеше катнашты. Безнес-бергәлекләрне ике илдән 100 компания һәм эшлекле ассоциацияләр тәкъдим итте.

Форумда ТР Премьер-министры Илдар Халиков җитәкчелегендәге Татарстан делегациясе дә катнашты.

Илдар Халиков билгеләп узганча, Әзәрбайҗан белән Татарстан арасында тыгыз сәүдә-икътисади һәм гуманитар элемтәләр булдырылган. Әзәрбайҗанда Татарстанның Даими вәкиллеге булу да моңа ярдәм итә, ул 1992 елдан бирле эшли. Татарстанның "КАМАЗ" һәм "Казан вертолет заводы" кебек предприятиеләре, шулай ук "Түбән Кама Нефть химиясе" ААҖ Әзәрбайҗанның күптәнге партнерлары санала.

ТР Премьер-министры "Бездә яңа проектлар да бик күп. Фармацевтика өлкәсендә хезмәттәшлек итүебез дә сөенечле. Бүгенге көндә Әзәрбайҗан Сәламәтлек саклау министрлыгы тарафыннан Татарстанның "Татхимфармпрепараты" предприятиесе әлеге республикага җибәргән 33 төрдәге дару препараты теркәлде", - дип тә ассызыклады.

"Тагын 7 көннән, 7 октябрьдә, Казанда Әзәрбайҗан Республикасының соклар җитештерү буенча иң эре компаниясе завод һәм логистик үзәк төзелешен башлый", - дип өстәде ТР Премьер-министры.