Татарстан Премьер-министры Рөстәм Миңнеханов: ТР Иҗтимагый палатасы республиканың күп кенә социаль проблемаларын хәл итәргә ярдәм итә

Бүген ТР Премьер-министры Рөстәм Миңнеханов Хөкүмәт Йортында Татарстан Республикасы Иҗтимагый палатасы әгъзалары белән очрашты.

Очрашуда иҗтимагый оешмаларның хакимият органнары белән хезмәттәшлеге, республика үсешенең социаль-икътисадый проблемаларын җәмгыять дәрәҗәсендә күтәрү һәм алар турында сөйләшү, дәүләт хакимияте органнары карарларны кабул иткәндә җәмәгатьчелек фикерен өйрәнү, иң мөһим закон проектларын тикшерү турында сүз барды.

Рөстәм Миңнеханов сүзләренчә, Иҗтимагый палата республикадагы күп кенә социаль проблемаларны хәл итәргә ярдәм итә. Әйтик, наркомания һәм токсикоманиягә каршы тору кебек мәсьәләләр.

Иҗтимагый палатаның хәзерге чакырылышына шактый авыр вакытта эшләргә туры килә, дип билгеләп үтте Рөстәм Миңнеханов. Финанс кризисы шартларында җәмгыятьтә янә тискәре күренешләр үзен сиздерә башлады. Ә без инде алар турында оныттык. Иҗтимагый палата иҗтимагый оешмалар белән багланышлар булдыру эшендә дә мөһим роль уйный.

Бүген өченче чакырылыш Иҗтимагый палатада 60 кеше исәпләнә (39 ир-ат һәм 21 хатын-кыз). Иҗтимагый палата әгъзалары үз эшен 15 эшлекле төркемдә алып бара.

Иҗтимагый палата 5,6 меңнән артык иҗтимагый оешма белән бәйләнешләр урнаштыра. Шуларның 2733е - иҗтимагый берләшмәләр, 1600е - коммерцияле булмаган оешмалар.

ТР Иҗтимагый палатасы рәисе Илгиз Хәйруллин яңгыраткан актуаль сораулар арасында массакүләм мәгълүмат чаралары белән элемтәнең начар булуы, Иҗтимагый палата биргән сорауларга чиновникларның җавап бирергә теләмәве кебек мәсьәләләр бар.

Моннан кала Илгиз Хәйруллин дәүләт хакимияте органнарының иҗтимагый оешмалар белән хезмәттәшлек турында закон чыгарырга һәм аны кабул итәргә тәкъдим итте.

ТР Премьер-министры Рөстәм Миңнеханов матбугат һәм массакүләм коммуникацияләр буенча республиканың "Татмедиа" агентлыгына Иҗтимагый палата эшчәнлеген ММЧда тиешенчә яктырту бурычы куелыр дип ышандырды. Ул шулай ук мәгълүмат таратуның ТР Министрлар Кабинетында актуаль темаларга брифинглар үткәрү кебек ысулын тәкъдим итте.

ТР Премьер-министры шулай ук Иҗтимагый палата әгъзалары сорауларын ТР Министрлар Кабинеты аппаратына юлларга тәкъдим итте. Бу рәвешле чиновникларның эшне башкару тәртибе яхшырачак.

Очрашуда Россия мәгариф академиясенең педагогика һәм һөнәри белем бирү психологиясе Институты директоры Гүзәл Мөхәммәтҗанова, "Эбиволь" ЯАҖ директоры, ТР Иҗтимагый палатасы рәисе урынбасары Татьяна Забегина, "Татмедиа" генераль директоры киңәшчесе Владимир Шевчук чыгыш ясадылар.

"Сезнең абруегызда шигебез юк, - диде ТР Премьер-министры Рөстәм Миңнеханов. – Иҗтимагый палата һәм хакимият конструктив рәвештә эшләр, һәм без күп кенә социаль мәсьәләләрне уңай якка хәл итә алырбыз дип өметләнәм. Безгә авыр чорда эшләргә,   күп кенә мәсьәләләрне "кул тәртибендә" хәл итәргә туры килә. Без - иң яхшылар, һәм бездә бар да яхшы дип әйтү дөрес булмас. Күп кенә яңалыклар авырлыклар белән кабул ителә. Кемдер хакимият органнарын һәрвакытта да чираттагы адымга этәреп торырга тиеш. Сез белгечләр, һәрдаим халык белән аралаша торган кешеләр буларак, хакимият өчен әһәмиятле. Кайвакыт сез сөйләгәннәрне ишетү рәхәт түгел, ләкин моннан беркая да качып булмый. Без контактка, хезмәттәшлеккә әзер. Шәхсән үземнән, минем командадан торганнарның барысын да эшләрбез".

Азактан ТР Хөкүмәте башлыгы Иҗтимагый палатадагы хатын-кызларны якынлашып килүче яз бәйрәме - 8нче март белән тәбрикләде.