Алексей Песошин “Милли китапханәләр: тарих этаплары һәм заманча йөз” фәнни-гамәли конференция ачылышында катнашты

Татарстан Республикасы милли китапханәсе – әйдәп баручы мәдәни, белем бирү һәм фәнни-тикшеренү үзәге, ул республика китапханәләренә җитди методик ярдәм күрсәтә. Бу хакта бүген ТР Премьер-министры вазифаларын башкаручы Алексей Песошин “Милли китапханәләр: тарих этаплары һәм заманча йөз” темасына фәнни-гамәли конференциянең тантаналы ачылышында хәбәр итте.
Тантана “Корстон” сәүдә-күңел ачу комплексы мәйданчыгында узды (Казан).

Бу зур китапханә форумы Татарстан Республикасы милли китапханәсенең 150 еллыгына багышланган, дип билгеләде Алексей Песошин.

Ул китапханә хезмәткәрләрен бу билгеле дата белән котлап, эшләрендә уңышлар теләде һәм Татарстан Президенты Рөстәм Миңнеханов исеменнән конференция кунакларына сәламләү сүзләрен укыды:
“Кадерле дуслар! Татарстан Республикасы миллли китапханәсенең 150 еллыгына багышланган “Милли китапханәләр: тарих этаплары һәм заманча йөз” темасына фәнни-гамәли конференциядә катнашучыларны ихлас күңелдән котлыйм. Безнең республиканың төп китапханәсе үзенең яшәү тарихы дәвамында Татарстанның зур байлыгы булып, рухи мирасының, фәнни һәм мәдәни эшчәнлегенең символы булып тора. Китапханә хезмәткәрләре һәм ветераннарына милли мәдәниятне, фәнне һәм мәгарифне саклаганнары һәм зур өлеш керткәннәре өчен, актив мәгърифәтчелек эшчәнлекләре өчен рәхмәт белдерәм. Барлык кунакларга һәм конференциядә катнашучыларга уңышлы эшләр, тәҗрибә һәм һөнәри белемнәре белән уртаклашуны телим. Иҗади күтәренкелек, онытылмас һәм уңай тәэсирләр сезгә!”

Алексей Песошин шулай ук алдынгы хезмәткәрләргә бүләкләр һәм “Татарстан Республикасының атказанган мәдәният хезмәткәре” исемнәрен, Татарстан Республикасы Министрлар Кабинетының рәхмәт хатларын тапшырды.