Татарстан боз кату чорында су объектларында куркынычсызлыкны тәэмин итүгә әзер

Быел Татарстан күлләрендә һәм елгаларында 118 кеше һәлак булган. Бу, узган елның шул чоры белән чагыштырганда, 12 кешегә азрак. Берникадәр уңай динамика күзәтелүгә карамастан, соңгы 3 айда гына да суда 18 гадәттән тыш очрак теркәлгән. Һава температурасы түбәнәюгә һәм сулыклаБыел Татарстан күлләрендә һәм елгаларында 118 кеше һәлак булган. Бу, узган елның шул чоры белән чагыштырганда, 12 кешегә азрак. Берникадәр уңай динамика күзәтелүгә карамастан, соңгы 3 айда гына да суда 18 гадәттән тыш очрак теркәлгән. Һава температурасы түбәнәюгә һәм сулыкларда боз барлыкка килә башлауга бәйле рәвештә, су объектлары кешеләр иминлеге өчен аеруча зур куркыныч тудыра.

Бу хакта бүген ТР Хөкүмәт йортында уздырылган брифингта Россия Гадәттән тыш хәлләр министрлыгының ТР буенча Баш идарәсе башлыгы урынбасары, Татарстанның кече үлчәмле суднолар буенча баш дәүләт инспекторы Юрий Венедиктов бәян итте.

Ул искәртеп узганча, балык тотарга һәвәс кешеләр, юка боз катламы барлыкка килә башлау белән, гомерләрен куркыныч астына куеп, боз катламының тиешле куркынычсызлык таләпләренә туры килүе-килмәвен тикшереп тормастан, ныгымаган боз өстенә чыгарга ашыга. Республиканың кече үлчәмле суднолар буенча баш дәүләт инспекторы китергән статистик мәгълүматларына караганда, узган кышкы чорда, әйтик, боз астына китүгә бәйле 13 очрак теркәлгән, нәтиҗәдә, 10 кешенең, шул исәптән 1 баланың, гомере өзелгән.

Юрий Венедиктов соңгы 3 елда боз кату чорында Татарстан Республикасындагы су объектларында, балыкчыларның боз кисәкләре убылып кузгалып китү нәтиҗәсендә, бәла-казаларга тару очраклары саны артты, дип ассызыклады. Әйтик, 2011 елда шундый 2 очрак килеп чыгып, беренче очракта боз кисәгендә 202, икенче очракта 168 кеше булган. Былтыр исә өстендә 126 балыкчы булган боз кисәге аерылып киткән.

Гадәттән тыш хәлләр министрлыгы вәкиле искәртеп узганча, бозга ялгыз чыгу өчен аның куркынычсыз катламы күлләр һәм буаларда кимендә 10 см, елгаларда 15 см булырга тиеш. Ныгыган боз барлыкка килсен өчен исә һава температурасының ике атна дәвамында 15 градустан түбән торуы зарур.

“Сулыкларда гадәттән тыш хәлләр очраклары килеп чыгуның төп сәбәпләрен һәм шартларын анализлау нәтиҗәләренә таянып, хәзерге вакытта Татарстан Республикасы территориясендә 2015-2016 елгы кышкы чорда су объектларында куркынычсызлык тәэминаты планы әзерләнде һәм расланды. Әлеге план буенча эшчәнлекне төп 2 юнәлеш буенча гамәлгә ашыру күздә тотыла: профилактик чаралар һәм кешеләрнең күпләп бозга чыгу урыннарында патруль тору”, – дип сөйләде Юрий Венедиктов.

Аерым алганда, бүген беренче юнәлеш буенча 30 меңгә якын кешене, шул исәптән балаларны, колачлаган 2,3 меңләп дәрес үткәрелгән. Массакүләм мәгълүмат чараларында сулыкларда үз-үзеңне куркынычсыз тотуның төп кагыйдәләрен искәрткән 100дән артык тематик материал дөнья күргән.

Моннан тыш, Татарстанның аз сыешлы суднолар буенча дәүләт инспекциясе хезмәткәрләре кешеләрнең күпләп бозга чыгу урыннарында патрульлек итәчәк. Рейдлар вакытында боз катламының калынлыгы, бозга чыгуны тыю билгеләренең булу-булмавы тикшерелә.

1 ноябрьдән Татарстанның су объектларында куркынычсызлык айлыгы гамәлдә. Аның кысаларында кешеләрнең бозга чыгу урыннарында профилактик чаралар, бозда балык тотарга яратучылар белән әңгәмәләр уздыру ниятләнә. Аларга суда үз-үзеңне тоту кагыйдәләрен искәртеп, боз астына төшеп киткән очракта үзеңә һәм башка кешегә ярдәм күрсәтергә өйрәтәчәкләр.

Россия Гадәттән тыш хәлләр министрлыгының ТР буенча Баш идарәсе башлыгы урынбасары 7 см-дан азрак калынлыктагы бозга чыккан гражданнарга 1,5 мең сумнан алып 2 меңгә кадәр штраф янаганлыгын искәртте, вазифаи затларга – 5 меңнән алып 7 меңгә кадәр, юридик затларга – 30 меңнән алып 70 меңгә кадәр.